ന്യൂനമർദ്ദത്തിന് സാധ്യത: മത്സ്യ തൊഴിലാളികൾ ജാഗ്രത പാലിക്കണം

തിരുവനന്തപുരം: തെക്കൻ ബംഗാൾ ഉൾക്കടലിന്റെ മധ്യഭാഗത്ത് നവംബർ ആറിന് ന്യൂനമർദ്ദത്തിന് സാധ്യതയുണ്ടെന്ന് കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ന്യൂനമർദ്ദം ചൊവ്വാഴ്ച മുതൽ വ്യാഴാഴ്ച വരെ പടിഞ്ഞാറ്, വടക്ക്, പടിഞ്ഞാറ് ദിശയിൽ നീങ്ങി കന്യ കുമാരിയുടെ (ശ്രീലങ്ക കോമോറിൻ) കടൽ വഴി നീങ്ങാൻ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പിൽ പറയുന്നു.

കാറ്റിന്റെ വേഗത 30 മുതൽ 40 കിലോമീറ്ററും ചില അവസരങ്ങളിൽ 50 കിലോമീറ്റർ വേഗവും കൈവരിക്കാൻ സാധ്യതയുണ്ട്. തെക്കു പടിഞ്ഞാറൻ ബംഗാൾ ഉൾക്കടലിലും ഇന്ത്യൻ മഹാസമുദ്രത്തിന്റെ ഭൂമധ്യരേഖാ പ്രദേശത്തും ചൊവ്വ, ബുധൻ ദിവസങ്ങളിലും കോമോറിൻ മേഖലയിലും ഗൾഫ് ഓഫ് മാന്നാർ മേഖലയിൽ ബുധൻ മുതൽ ഞായർ ദിവസങ്ങളിലും കാറ്റടിക്കാൻ സാധ്യതയുണ്ട്. ഈ മേഖലയിൽ കടൽ പ്രക്ഷുബ്ധമോ അതി പ്രക്ഷുബ്ധമോ ആകാനിടയുണ്ട്.

ചൊവ്വ, ബുധൻ ദിവസങ്ങളിൽ തെക്കു പടിഞ്ഞാറൻ ബംഗാൾ ഉൾക്കടലിലും ഇന്ത്യൻ മഹാസമൂദ്രത്തിന്റെ ഭൂമധ്യരേഖാ പ്രദേശത്തും ബുധൻ, വ്യാഴം ദിവസങ്ങളിൽ കോമോറിൻ മേഖലയിലും ഗൾഫ് ഓഫ് മാന്നാർ മേഖലയിലും മത്സ്യബന്ധനത്തിന് പോകരുതെന്നും നിർദ്ദേശമുണ്ട്. ഈ മേഖലയിൽ മത്സ്യബന്ധനത്തിന് പോയവർ ചൊവ്വാഴ്ചയ്ക്കു മുമ്പ് തിരികെയെത്തണമെന്നും കാലാവസ്ഥാ നിരീക്ഷണകേന്ദ്രം മുന്നറിയിപ്പ് നൽകി.