24 മണിക്കൂറിനുള്ളിൽ ന്യൂനമർദ്ദം ചുഴലിക്കാറ്റാകാൻ സാധ്യത

തിരുവനന്തപുരം: അടുത്ത 24 മണിക്കൂറിനുള്ളിൽ ന്യൂനമർദ്ദം ചുഴലിക്കാറ്റായി മാറുമെന്ന് കാലാവസ്ഥാ നിരീക്ഷണ കേന്ദ്രം. മിനിക്കോയ്ക്ക് 730 കിലോമീറ്റർ പടിഞ്ഞാറായാണ് ന്യൂനമർദ്ദം രൂപപ്പെട്ടത്. ആദ്യ ചുഴലിക്കാറ്റ് മുന്നറിയിപ്പ് കാലാവസ്ഥാ കേന്ദ്രം പുറപ്പെടുവിച്ചു. അഞ്ചു ജില്ലകളിൽ ഓറഞ്ച് അലർട്ട് തുടരുന്നതിനിടെയാണ് ചുഴലിക്കാറ്റ് മുന്നറിയിപ്പ്.

നാളെയും മറ്റന്നാളും സംസ്ഥാനത്ത് അതിശക്തമായ മഴയും ഉണ്ടാകാൻ സാധ്യതയുണ്ട്. മലപ്പുറം, ഇടുക്കി ജില്ലകളിൽ പ്രഖ്യാപിച്ചിരുന്ന റെഡ് അലർട്ട് ഇന്ന് പിൻവലിച്ചിരുന്നു. അഡീഷണൽ ചീഫ് സെക്രട്ടറിയുടെ നേതൃത്വത്തിൽ സെക്രട്ടേറിയറ്റിൽ 24 മണിക്കൂർ സെൽ പ്രവർത്തനം ആരംഭിച്ചു. കൂടാതെ, ശക്തമായ മഴക്കുള്ള സാധ്യത കണക്കിലെടുത്ത് ഇടുക്കി അണക്കെട്ടിന്റെ ഷട്ടർ ഇന്ന് തുറന്നു. സെക്കൻഡിൽ 50,000 ലിറ്റർ വെള്ളം അണക്കെട്ടിൽ നിന്ന് ഒഴുക്കി വിടുന്നുണ്ട്.