പോലീസ് നിയന്ത്രണം; ഭക്തർക്ക് ബുദ്ധിമുട്ടായേക്കാമെന്ന് ദേവസ്വം ബോർഡ്

പമ്പ: ശബരിമലയിൽ ഏർപ്പെടുത്തിയ സുരക്ഷാ ക്രമീകരണത്തിൽ ദേവസ്വം ബോർഡിന് അതൃപ്തി. പമ്പയിൽ സുരക്ഷ കർശനമാക്കിക്കൊണ്ട് പോലീസ് നൽകിയ നോട്ടീസ് ദേവസ്വം ബോർഡ് ചർച്ച ചെയ്തു. പോലീസ് നിർദ്ദേശിച്ചിരിക്കുന്ന ചില നിയന്ത്രണങ്ങൾ ബുദ്ധിമുട്ടായേക്കാം എന്ന് ദേവസ്വം ബോർഡ് വ്യക്തമാക്കി.

രാത്രിയിലുള്ള നെയ്യഭിഷേകത്തിന് നിയന്ത്രണം വരുത്തിയത് ബുദ്ധിമുട്ടാകും. ഹരിവരാസനം പാടി നടയടച്ചശേഷം ഭക്തർ ശബരിമലയിൽ തുടരരുതെന്ന നിർദ്ദേശം തീർത്ഥാടകരെ വലയ്ക്കും. കൃത്യമായ വിവരങ്ങളുടെ അടിസ്ഥാനത്തിലായിരിക്കാം പോലീസ് നിർദ്ദേശം നൽകിയത്. അതിനാൽ നിർദ്ദേശം പരിഗണിക്കാമെന്ന് ദേവസ്വം ബോർഡ് വ്യക്തമാക്കി.

പ്രളയ ശേഷം പമ്പയിൽ പരിമിതമായ സൌകര്യം മാത്രമാണുള്ളത്. ഉള്ളതുകൊണ്ട് സൌകര്യം ഒരുക്കിയിട്ടുണ്ടെന്നും ദേവസ്വം ബോർഡ് പ്രസിഡന്റ് എ പദ്മകുമാർ പറഞ്ഞു.

രാത്രി പതിനൊന്നുമണിക്കു ശേഷം അപ്പം, അരവണ കൌണ്ടർ തുറക്കരുതെന്ന് പോലീസ് ദേവസ്വം ബോർഡിന് നൽകിയ നോട്ടീസിൽ പറയുന്നു. അന്നദാന കേന്ദ്രങ്ങൾ രാത്രി പതിനൊന്നുമണിക്ക് അടയ്ക്കണമെന്നും നിർദ്ദേശമുണ്ട്. ഹോട്ടലുകൾ അടക്കമുള്ള കച്ചവട സ്ഥാപനങ്ങൾക്കും പതിനൊന്നു മണിക്കു ശേഷം നിയന്ത്രണമുണ്ട്.