ശബരിമലയിൽ യുവതികൾക്ക് പ്രവേശനമാകാം എന്ന നിലപാടുമായി ദേവസ്വം ബോർഡ്

തിരുവനന്തപുരം: ശബരിമലയിൽ യുവതികൾ പ്രവേശിക്കരുതെന്ന നിലപാട് ദേവസ്വം ബോർഡ് തിരുത്തുന്നു. സർക്കാർ നിലപാടിനെ ദേവസ്വം ബോർഡ് സുപ്രീംകോടതിയിൽ പിന്തുണയ്ക്കുമെന്ന് മനോരമ റിപ്പോർട്ട് ചെയ്തു. ചൊവ്വാഴ്ചയാണ് യുവതീ പ്രവേശനം സംബന്ധിച്ച ഹർജി സുപ്രീംകോടതി പരിഗണിക്കുന്നത്.

മനു അഭിഷേക് സിങ്വിക്ക് പകരം മുതിർന്ന അഭിഭാഷകൻ ആര്യാമ സുന്ദരം ദേവസ്വം ബോർഡിന്റെ ഭാഗം സുപ്രീംകോടതിയിൽ വിശദീകരിക്കും.കേസ് സുപ്രീംകോടതിയിൽ എത്തിയ ശേഷം ഹാജരായിരുന്ന അഭിഭാഷക ബീന മാധവൻ ബോർഡ് നിലപാട് തിരുത്തിയതിനെത്തുടർന്ന് പിന്മാറി. പി എസ് സുധീറാണ് പകരം ഹാജരാകുക.

യുവതീ പ്രവേശനത്തെക്കുറിച്ച് പുഃനപരിശോധനാ ഹർജികളും റിട്ട് ഹർജികളും പരിഗണിക്കുമ്പോൾ ബോർഡ് നിലപാട് വ്യക്തമാക്കേണ്ടിവരും. വിധി നടപ്പാക്കാൻ നേരിട്ട തടസ്സങ്ങൾ സംബന്ധിച്ച റിപ്പോർട്ടും തയ്യാറാക്കിയിട്ടുണ്ട്.

ശബരിമലയിൽ യുവതികൾ പ്രവേശിക്കുന്നതുമായി ബന്ധപ്പെട്ട് ദേവസ്വം ബോർഡ് രണ്ടുപതിറ്റാണ്ടായി സ്വീകരിച്ചുവന്നിരുന്ന നിലപാടിൽനിന്നും വ്യതിചലിച്ചാണ് യുവതീ പ്രവേശനത്തിന് അനുകൂലമായി ബോർഡ് നിലപാടെടുത്തിരിക്കുന്നത്.