സാവകാശ ഹർജി: ദേവസ്വം ബോർഡിന്റെ തീരുമാനം ഇന്ന്

തിരുവനന്തപുരം: എല്ലാ പ്രായത്തിലുമുള്ള സ്ത്രീകൾക്ക് ശബരിമലയിൽ പ്രവേശനം നൽകണമെന്നുള്ള സുപ്രീംകോടതി ഭരണഘടനാ ബെഞ്ചിന്റെ ഉത്തരവ് നടപ്പാക്കാൻ സാവകാശ ഹർജി നൽകുന്നതിൽ ദേവസ്വം ബോർഡിന്റെ അന്തിമ തീരുമാനം ഇന്ന്. പന്തളം-തന്ത്രി കുടുംബങ്ങളുമായി നടത്തിയ ചർച്ചയ്ക്കൊടുവിലാണ് സാവകാശ ഹർജി നൽകാനുള്ള നീക്കവുമായി ദേവസ്വം ബോർഡ് മുന്നോട്ടുപോകുന്നത്.

യുവതി പ്രവേശന വിഷയത്തിൽ സർക്കാർ വിട്ടുവീഴ്ചയ്ക്ക് തയ്യാറല്ലെന്ന് മുഖ്യമന്ത്രി ആവർത്തിച്ച് വ്യക്തമാക്കിയിരുന്നു. എന്നാൽ ദേവസ്വം ബോർഡുവഴി സമവായ നീക്കത്തിനാണ് സർക്കാർ ശ്രമിക്കുന്നത്. ദേവസ്വം ബോർഡിന്റേത് സ്വതന്ത്ര നീക്കമാണെന്നാണ് സർക്കാരിന്റെ വാദം. സർവ്വകക്ഷി യോഗത്തിൽ വിധി നടപ്പാക്കുന്നതിൽ സാവകാശമില്ലെന്ന് മുഖ്യമന്ത്രി പറഞ്ഞിരുന്നു. എന്നാൽ പന്തളം- തന്ത്രി കുടുംബാംഗങ്ങളുമായി നടത്തിയ ചർച്ചയിലാണ് സാവകാശ ഹർജി നൽകാനുള്ള തീരുമാനം ഉരുത്തിരിഞ്ഞത്.

സർക്കാർ സാവകാശ ഹർജ്ജി നൽകില്ലെങ്കിൽ ദേവസ്വം ബോർഡ് ഹർജി നൽകണമെന്ന് പന്തളം-തന്ത്രി കുടുംബാംഗങ്ങൾ ആവശ്യപ്പെട്ടു. ഇത് മുഖ്യമന്ത്രി അംഗീകരിക്കുകയായിരുന്നു.

സുപ്രീംകോടതിയിലെ അഭിഭാഷകരുമായി ചേർന്ന് ആലോചിച്ചാകും ദേവസ്വം ബോർഡ് തീരുമാനം എടുക്കുക. നേരത്തെ വിധി സ്റ്റേ ചെയ്യണമെന്ന ആവശ്യം സുപ്രീംകോടതി തള്ളിയിരുന്നു.