വിശ്വാസി സമൂഹത്തോട് ശ്രീധരന്‍പിള്ള മാപ്പ് പറയണം: കടകംപള്ളി

തിരുവനന്തപുരം: യുവമോര്‍ച്ചാ യോഗത്തിലെ വിവാദപ്രസംഗത്തിന്‍റെ ശബ്ദരേഖ പുറത്തെത്തിയതിനു പിന്നാലെ ബിജെപി സംസ്ഥാന അധ്യക്ഷൻ പി.എസ് ശ്രീധരൻ പിള്ളയ്‍ക്കെതിരെ ദേവസ്വം മന്ത്രി കടകംപള്ളി സുരേന്ദ്രൻ. വിശ്വാസി സമൂഹത്തോട് ശ്രീധരന്‍പിള്ള മാപ്പ് പറയണമെന്ന് മന്ത്രി കടകംപള്ളി സുരേന്ദ്രന്‍ ആവശ്യപ്പെട്ടു.

ശബരിമല വിഷയം നമുക്കൊരു സുവര്‍ണാവസരമായിരുന്നെന്നും നമ്മള്‍ മുന്നോട്ടു വെച്ച അജണ്ടയില്‍ ഓരോരുത്തരായി വീണെന്നുമുള്ള ശ്രീധരന്‍പിള്ളയുടെ ശബ്ദരേഖയായിരുന്നു ഇന്ന് രാവിലെ പുറത്തുവന്നിരുന്നത്. നട അടയ്ക്കുവാനുള്ള തീരുമാനം ബിജെപിയുമായി ആലോചിച്ചായിരിക്കുമെന്നും മറ്റും തന്ത്രിയോട് പറഞ്ഞതായും അദ്ദേഹം പ്രസംഗത്തിൽ പറഞ്ഞിരുന്നു. ഇതിനെതിരെയാണ് ദേവസ്വം മന്ത്രിയുടെ മറുപടി. എന്നാൽ താൻ ശ്രീധരൻ പിളളയെ വിളിച്ചിട്ടില്ലെന്നും നിയമോപദേശം തേടിയിട്ടില്ലെന്നും തന്ത്രി കണ്ഠരര് രാജീവര് രാത്രിയോടെ വ്യക്തമാക്കിയിട്ടുണ്ട്.