ക്രിമിനല്‍ കേസുകളില്‍ 387 പോലീസുകാരെന്ന് ഡിജിപി

തിരുവനന്തപുരം: പോലീസ് സേനയിലെ 387 ഉദ്യോഗസ്ഥർ ക്രിമിനല്‍ കേസുകളില്‍ പ്രതികളായവരാണെന്ന് ഡിജിപി ലോക്‌നാഥ് ബെഹ്‌റ. ഡിജിപി മനുഷ്യാവകാശ കമ്മിഷനു നല്‍കിയ റിപ്പോര്‍ട്ടിലാണ് ഈ കാര്യം രേഖപ്പെടുത്തിയിരിക്കുന്നത്. പോലീസില്‍ ക്രിമിനല്‍ കേസുകളില്‍ പ്രതികളായ 1129 ഉദ്യോഗസ്ഥരുണ്ടെന്ന് വിവരാവകാശ നിയമപ്രകാരമുള്ള രേഖകള്‍ പുറത്തുവന്നതിന് പിന്നാലെയാണിത്.

കേരള പൊലീസ് ആക്ടിലെ 86-ാം വകുപ്പു പ്രകാരം ഇവര്‍ക്കെതിരെ നടപടി സ്വീകരിക്കണമെന്നും ഇതിനെക്കുറിച്ചുള്ള റിപ്പോര്‍ട്ട് സമര്‍പ്പിക്കണമെന്നും മാധ്യമ വാര്‍ത്തകളുടെ അടിസ്ഥാനത്തില്‍ മനുഷ്യാവകാശ കമ്മിഷന്‍ ആവശ്യപ്പെട്ടതിനെത്തുടര്‍ന്നാണ് ഡിജിപി റിപ്പോര്‍ട്ട് സമര്‍പ്പിച്ചത്. പോലീസിലെ ക്രിമിനലുകളെക്കുറിച്ച്‌ പഠിക്കാന്‍ മനുഷ്യാവകാശ കമ്മിഷന്റെ നിര്‍ദേശാനുസരണം ഡിജിപി ക്രൈമിന്റെ നേതൃത്വത്തില്‍ രൂപീകരിച്ച നാലംഗ സമിതി ഈയാഴ്ച റിപ്പോര്‍ട്ട് സമര്‍പ്പിക്കാനിരിക്കെയാണ് ഡിജിപിയുടെ റിപ്പോര്‍ട്ട് പുറത്തായിരിക്കുന്നത്.