ബിഷപ്പിന്‍റെ അറസ്റ്റ് ഇന്ന്? നിയമതടസ്സമില്ലെന്ന് ഡിജിപി ബെഹ്റ

കൊച്ചി: തുടര്‍ച്ചയായ രണ്ടാം ദിവസത്തെ ചോദ്യം ചെയ്യലിന് ശേഷം ഇന്ന് ജലന്ധര്‍ ബിഷപ്പ് ഫ്രാങ്കോ മുളയ്ക്കലിനെ അറസ്റ്റ് ചെയ്തേക്കുമെന്ന സൂചന ബലപ്പെടുത്തി റിപ്പോര്‍ട്ടുകള്‍. കന്യാസ്ത്രീയുടെ ലൈംഗിക പീഡനപരാതിയിൽ ബിഷപ്പിനെ അറസ്റ്റ് ചെയ്യാൻ നിയമതടസ്സമില്ലെന്ന് ഡിജിപി ലോക്നാഥ് ബെഹ്റ തിരുവനന്തപുരത്ത് മാധ്യമങ്ങളോട് പറഞ്ഞു.

മുൻകൂര്‍ ജാമ്യാപേക്ഷ കോടതിയുടെ പരിഗണനയിലിരിക്കുന്ന സാഹചര്യത്തിലും ബിഷപ്പിനെ അറസ്റ്റ് ചെയ്യുന്നതിൽ നിയമതടസ്സമില്ലെന്നും ചോദ്യം ചെയ്യൽ പൂര്‍ത്തിയാക്കിയ ശേഷം ഇന്നോ നാളെയോ തീര്‍ച്ചയായും തീരുമാനമെടുക്കുമെന്നും അദ്ദേഹം പറഞ്ഞു. ഇക്കാര്യത്തിൽ അന്വേഷണസംഘത്തിന് സ്വതന്ത്രമായി തീരുമാനമെടുക്കാമെന്നും അദ്ദേഹം കൂട്ടിച്ചേര്‍ത്തു.

സെപ്റ്റംബര്‍ 18ന് ബിഷപ്പ് കേരള ഹൈക്കോടതിയിൽ മുൻകൂര്‍ ജാമ്യാപേക്ഷ സമര്‍പ്പിച്ചെങ്കിലും കോടതി ഇത് പരിഗണിക്കുന്നത് 25ലേയ്ക്ക് മാറ്റുകയായിരുന്നു.

അതേസമയം, ചോദ്യം ചെയ്യലിൽ ബിഷപ്പിന്‍റെ മൊഴിയിൽ അന്വേഷണസംഘം തൃപ്തരല്ലെന്നാണ് സൂചന. ബിഷപ്പിന്‍റെ മൊഴി തൃപ്തികരമല്ലെന്നും തെളിവുകളുള്ള സാഹചര്യത്തിൽ അറസ്റ്റ് അനിവാര്യമാണെന്നും പോലീസ് യോഗത്തിൽ വിലയിരുത്തലുണ്ടായതായി മനോരമ ന്യൂസ് റിപ്പോര്‍ട്ട് ചെയ്തു. അറസ്റ്റ് മുന്നിൽക്കണ്ട് ചോദ്യം ചെയ്യൽ നടക്കുന്ന തൃപ്പൂണിത്തുറയിലെ പോലീസ് കേന്ദ്രത്തിന് സമീപം സുരക്ഷ ശക്തമാക്കിയിരുന്നു.