പി.കെ.ശശി എംഎൽഎക്കെതിരെ ഡിജിപി നിയമോപദേശം തേടി

തിരുവനന്തപുരം: ഡിജിപി ലോക്‌നാഥ് ബെഹ്‌റ പി.കെ.ശശി എംഎൽഎക്കെതിരായ പീഡന പരാതിയിൽ നിയമോപദേശം തേടി. വിഷയത്തിൽ കെഎസ്‍യുവും യുവമോർച്ചയും ഡിജിപിക്ക് നേരത്തെ പരാതി നൽകിയിരുന്നു. പെൺകുട്ടിക്ക് നേരിട്ട് പരാതി നൽകാൻ കഴിയാത്തതിനെ തുടർന്നാണ് നടപടികളെ കുറിച്ച് ഡിജിപി നിയമോപദേശം തേടിയത്.

അതിനിടെ, പരാതി കിട്ടിയാൽ അന്വേഷിക്കുമെന്നും പെൺകുട്ടി പരാതി നൽകാൻ തയ്യാറാകണമെന്നും വനിതാ കമ്മീഷൻ അധ്യക്ഷ എം.സി.ജോസഫൈൻ വ്യക്തമാക്കി. എംഎൽഎക്കെതിരെയുള്ള കേസിൽ സമ്മർദ്ദങ്ങൾക്ക് വഴങ്ങില്ല.ഷൊർണ്ണൂർ എംഎൽഎ പി.കെ.ശശിക്കെതിരെ ഡിവൈഎഫ്ഐ പ്രവർത്തകയായ യുവതിയാണ് ലൈംഗികാരോപണം ഉന്നയിച്ചത്. പോലീസിൽ പരാതി നൽകാതെ യുവതി സിപിഎം നേതൃത്വത്തിനാണ് പരാതി നൽകിയത്.

വനിതാ കമ്മീഷന് പരാതിയിൽ ഇടപെടാൻ കഴിയില്ലെന്ന ജോസഫൈന്റെ മുൻ പ്രസ്താവന വിവാദമായിരുന്നു.വനിതാ കമ്മീഷൻ ആർക്കും രാഷ്ട്രീയ പരിഗണന നൽകില്ലെന്നും അവർ വ്യക്തമാക്കി. അതെ സമയം, ലോക്കൽ,ബ്രാഞ്ച് സെക്രട്ടറിമാരുടെ യോഗം വിളിച്ച് എംഎൽഎ കരുത്ത് തെളിയിക്കുകയാണെന്നും ആരോപണമുണ്ട്.