വനിതാഡോക്ടര്‍ രാത്രി ട്രെയിനിൽ നിന്ന് വീണു മരിച്ചു

തൃശ്ശൂര്‍: കുട്ടികള്‍ക്കും സഹായിയ്ക്കുമൊപ്പം വീട്ടിലേയ്ക്കു പോകവെ ട്രെയിനിൽ നിന്ന് വിണു വനിതാ‍ഡോക്ടര്‍ മരിച്ചു. ഒപ്പമുണ്ടായിരുന്ന കുട്ടികള്‍ അമ്മ പോയതറിയായ യാത്ര തുടര്‍ന്നു. ഒടുവിൽ കുട്ടികളെ ബന്ധുക്കളെ ഏൽപ്പിച്ചത് സഹയാത്രികര്‍.

കോന്നി കല്ലേലി ഗവ. ആയുര്‍വേദ ആശുപത്രിയിലെ മെഡിക്കൽ ഓഫീസറായ തുഷാര (38) ആണു മരിച്ചത്. ചൊവ്വാഴ്ച പുലര്‍ച്ചെ തിരുവനന്തപുരത്തുനിന്ന് മംഗളുരുവിലേയ്ക്കുള്ള മലബാര്‍ എക്സ്പ്രസിലായിരുന്നു സംഭവം. കണ്ണൂരിലെ സ്വന്തം വീട്ടിലേയ്ക്ക് മൂന്നു മക്കളെയും സഹായിയായ സ്ത്രീയെയും കൂട്ടി പോകുകയായിരുന്നു തുഷാര. ഭര്‍ത്താവ് ഡോ. അനൂപ് മുരളീധരൻ ചെങ്ങന്നൂരിൽ നിന്ന് രാത്രി ഒന്‍പതരയോടെ തീവണ്ടി കയറ്റിവിടുകയായിരുന്നു. റിസര്‍വേഷൻ കോച്ചിലായിരുന്നു ഇവര്‍ അഞ്ചു പേരും.

രാത്രി യാത്രക്കാര്‍ ഉറങ്ങിക്കിടക്കുമ്പോഴായിരുന്നു അപകടം. രാവിലെ ഉണര്‍ന്നപ്പോള്‍ സ്കൂള്‍ വിദ്യാര്‍ത്ഥികളായ മക്കള്‍ കാളിദാസനും വൈദേഹിയും അമ്മയെ കാണാനില്ലെന്ന് യാത്രക്കാരെ അറിയിക്കുകയായിരുന്നു. ഇളയ കുട്ടി വൈഷ്ണവിയ്ക്ക് രണ്ടുവയസ്സുമാത്രമാണ് പ്രായം. തുടര്‍ന്ന് സഹയാത്രികര്‍ ട്രെയിനിൽ അന്വേഷിച്ചിട്ടും കാണാതായതോടെ കുട്ടികളുടെ കയ്യിൽ നിന്നും കണ്ണൂരിലെ ബന്ധുക്കളുടെ ഫോൺ നമ്പര്‍ വാങ്ങി ബന്ധപ്പെടുകയായിരുന്നു. കുട്ടികളെയും സഹായിയെയും ബന്ധുക്കളെ ഏൽപിച്ചു. തുടര്‍ന്ന് ബന്ധുക്കൾ നല്‍കിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് തൃശ്ശൂര്‍ കോലഴി പോട്ടോറിൽ തുഷാരയുടെ മൃതദേഹം കണ്ടെത്തിയത്.

രാത്രി ശൗചാലയത്തിൽ പോകുമ്പോൾ അബദ്ധത്തിൽ പുറത്തേയ്ക്ക് വീണതാകാമെന്നാണ് വിയ്യൂര്‍ പോലീസിന്‍റെ നിഗമനം. ആയുര്‍വേദ മെഡിക്കല്‍ ഓഫീസേഴ്‌സ് അസോസിയേഷന്‍ പത്തനംതിട്ട ജില്ലാ പ്രസിഡന്‍റും കൂടൽ ശ്രീഭാരത് ആയുര്‍വേദ ഹോസ്പിറ്റൽ ഉടമയുമാണ് ഭര്‍ത്താവ് ഡോ. അനൂപ് മുരളീധരന്‍. പത്തനാപുരം സെന്‍റ് മേരീസ് സ്‌കൂള്‍ വിദ്യാര്‍ഥികളാണ് കാളിദാസനും വൈദേഹിയും. കണ്ണൂര്‍ താവക്കര തുഷാരത്തില്‍ റിട്ട. സ്റ്റാറ്റിസ്റ്റിക്കല്‍ സൂപ്രണ്ട് വേലായുധൻ്റെയും സുമംഗലയുടെയും മകളാണ് ഡോ. തുഷാര. ശവസംസ്‌കാരം ബുധനാഴ്ച 2.30-ന് കൂടലിലെ വീട്ടുവളപ്പില്‍ നടക്കും.