ആലപ്പുഴയില്‍ ബലാത്സംഗക്കേസില്‍ ഡി.വൈ.എഫ്.ഐ. നേതാവ് അറസ്‍റ്റില്‍

ആലപ്പുഴ: വീട്ടമ്മയെ ബാലാത്സംഗം ചെയ്യുകയും നഗ്നചിത്രങ്ങള്‍ സാമൂഹിക മാധ്യമങ്ങളിലൂടെ പ്രചരിപ്പിക്കുകയും ചെയ്‍ത കേസില്‍ ഡി.വൈ.എഫ്.ഐ. നേതാവ് അറസ്റ്റില്‍. ഡി.വൈ.എഫ്.ഐ. വള്ളിക്കുന്നം മേഖലാ കമ്മിറ്റി അംഗം സുനിഷ് സിദ്ദിഖ് ആണ് അറസ്റ്റിലായത്.

ശനിയാഴ്‍ച വൈകീട്ടാണ് സുനിഷിനെ പോലീസ് കസ്റ്റഡിയിലെടുത്തത്. നഗ്നചിത്രങ്ങള്‍ കാണിച്ച് സുനിഷ് സിദ്ദിഖ് ഭീഷണിപ്പെടുത്തുകയും തന്‍റെ കൈയില്‍ നിന്ന് അമ്പതിനായിരം രൂപ തട്ടിയെടുക്കുകയും ചെയ്‍തതായും വീട്ടമ്മ പോലീസില്‍ നല്‍കിയ പരാതിയില്‍ പറയുന്നു. പീ‍ഡന വിവരം ആരോടെങ്കിലും പറഞ്ഞാല്‍ കൊന്നുകളയുമെന്ന് സുനിഷ് ഭീഷണിപ്പെടുത്തിയെന്നും പരാതിയില്‍ പറയുന്നു.

ഏറെ നാളായി തുടരുന്ന ഭീഷണി അസഹനീയമായപ്പോഴാണ് പരാതി നല്‍കിയതെന്നും വീട്ടമ്മ പോലീസിനോട് പറഞ്ഞു.

അതേസമയം, പീഡക്കേസില്‍ അറസ്റ്റിലായ സുനിഷ് സിദ്ദിഖ് ഡി.വൈ.എഫ്.ഐ. ഭാരവാഹി അല്ലെന്നും അനുഭാവി മാത്രമാണെന്നും ഡി.വൈ.എഫ്.ഐ. ആലപ്പുഴ ജില്ലാ കമ്മിറ്റി അറിയിച്ചു.