സനൽകുമാര്‍ കൊലക്കേസിലെ പ്രതി ഡിവൈഎസ്‍‍പി ഹരികുമാര്‍ മരിച്ച നിലയിൽ

തിരുവനന്തപുരം: നെയ്യാറ്റിൻകര സനല്‍കുമാര്‍ കൊലപാതകക്കേസിലെ പ്രതി ഡിവൈഎസ്‍‍പി ഹരികുമാറിനെ മരിച്ച നിലയിൽ കണ്ടെത്തി. കല്ലമ്പലത്തെ വീട്ടിനു പിന്നിലാണ് തൂങ്ങിമരിച്ച നിലയിൽ കണ്ടെത്തിയത്.

ഹരികുമാര്‍ കര്‍ണാടകയിൽ ഒളിവിലായിരുന്നു എന്നാണ് റിപ്പോർട്ട്. കീഴടങ്ങാനായാണ് ഇന്നലെ ഇയാള്‍ കേരളത്തിലെത്തിയതെന്നാണ് സൂചന.

സനൽ കുമാറിനെ കാറിന് മുന്നില്‍ തള്ളിയിട്ട് കൊലചെയ്തത് മനപ്പൂര്‍വ്വമെന്ന് ക്രൈംബ്രാഞ്ച് റിപ്പോര്‍ട്ട് നല്‍കിയിരുന്നു. ഇത് കോടതിയിൽ സമര്‍പ്പിക്കാനിരിക്കേയാണ് ഹരികുമാറിനെ മരിച്ച നിലയിൽ കണ്ടെത്തിയത്. വഴിയിലൂടെ വാഹനം വരുന്നത് കണ്ടാണ് സനലിനെ തള്ളിയിട്ട് ഡിവൈഎസ്‍പി ഹരികുമാര്‍ കൊലപ്പെടുത്തിയതെന്നും ക്രൈംബ്രാഞ്ച് റിപ്പോര്‍ട്ടില്‍ രേഖപ്പെടുത്തിയിട്ടുണ്ട്.

ഹരികുമാറിന് മുന്‍‌കൂര്‍ ജാമ്യം നല്‍കരുത് എന്നും ക്രൈംബ്രാഞ്ച് റിപ്പോര്‍ട്ടില്‍ ആവശ്യം അറിയിച്ചിരുന്നു. പൊലീസിനെ കബളിപ്പിക്കല്‍, തെളിവ് നശിപ്പിക്കല്‍, സംഘംചേരല്‍, മര്‍ദ്ദനം തുടങ്ങിയ വകുപ്പുകളും ഹരികുമാറിനെതിരെ ചുമത്തിയിരുന്നു.

പ്രതിയെ പോലീസ് പിടികൂടാന്‍ അലംഭാവം കാണിക്കുന്നു എന്നാരോപിച്ച്‌ സനലിന്‍റെ ഭാര്യ ചൊവ്വാഴ്ച രാവിലെ എട്ട് മണി മുതല്‍ നിരാഹാരസമരം ആരംഭിച്ചിരുന്നു. ഹരികുമാറിനെ മരിച്ച നിലയിൽ കണ്ടെത്തിയ പശ്ചാത്തലത്തിലും സമരം അവസാനിപ്പിക്കില്ലെന്നും സംഭവത്തിൽ പങ്കുള്ള മറ്റുള്ളവരെയും അറസ്റ്റ് ചെയ്യണമെന്നും സനൽകുമാറിന്‍റെ കുടുംബം അറിയിച്ചു.

കേസിൽ ഹരികുമാറിന്‍റെ സഹായിയുടെ മകൻ അനൂപ് കൃഷ്ണ ഉള്‍പ്പടെ രണ്ട് പേരെ ക്രൈംബ്രാഞ്ച് അറസ്റ്റ് ചെയ്യുകയും ഹരികുമാര്‍ രക്ഷപെടാൻ ഉപയോഗിച്ച കാര്‍ കണ്ടെത്തുകയും ചെയ്തിരുന്നു.