Neyyattinkara murder: മുന്‍കൂര്‍ ജാമ്യാപേക്ഷയുമായി ഡിവൈഎസ്പി

തിരുവനന്തപുരം: നെയ്യാറ്റിന്‍കരയില്‍ യുവാവ് വാഹനമിടിച്ച് കൊല്ലപ്പെട്ട കേസിലെ മുഖ്യപ്രതിയായ ഡിവൈഎസ്പി മുന്‍കൂര്‍ ജാമ്യം തേടി കോടതിയില്‍. ഡിവൈഎസ്പി ബി ഹരികുമാറാണ് ജാമ്യാപേക്ഷയുമായി തിരുവനന്തപുരം ജില്ലാ സെഷന്‍സ് കോടതിയെ സമീപിച്ചത്. റോഡിലെ തര്‍ക്കത്തിനിടെ ഡിവൈഎസ്പി ഹരികുമാര്‍ പിടിച്ചു തള്ളിയതിനെ തുടര്‍ന്ന് കാറിടിച്ചാണ് യുവാവ് മരണപ്പെട്ടത്.

ഇന്നലെയാണ് നെയ്യാറ്റിൻകരയിൽ സനൽ കുമാർ എന്ന യുവാവിനെ വാഹനം പാർക്ക് ചെയ്തതിനെ തുടർന്നുള്ള തർക്കത്തിനിടയിൽ ഡിവൈഎസ്‌പി ഹരികുമാർ റോഡിലേക്ക് തള്ളിയത്. റോഡിലേക്ക് വീണ സനൽ കുമാർ കാറിടിച്ച് മരിച്ചു. ആശുപത്രിയിലേക്ക് കൊണ്ട് പോകുന്നതിന് പകരം പോലീസ് വാഹനത്തിൽ സനലിനെ നെയ്യാറ്റിൻകര പോലീസ് സ്റ്റേഷനിലേക്ക് കൊണ്ട് പോയെന്ന് നാട്ടുകാർ ആരോപിച്ചു.

സനാലുമായി തർക്കമുണ്ടായി ശേഷം ഒളിവിൽ പോയ ഡിവൈഎസ്‌പിയെ കണ്ടെത്താൻ ഇത് വരെ പൊലീസിന് സാധിച്ചിട്ടില്ല. ഹരികുമാറിന്‍റെ പാസ്‌പോർട്ട് പോലീസ് കണ്ടുകെട്ടുമെന്ന് സൂചനയുണ്ട്. ഹരികുമാർ വിദേശത്തേക്ക് കടക്കുന്നത് തടയാനാണ് പോലീസ് നീക്കം. ഹരികുമാറിനായി ഇന്ന് തന്നെ പോലീസ് ലുക് ഔട്ട് നോട്ടീസ് ഇറക്കിയേക്കും.