കെഎം ഷാജി എംഎൽഎ കോഴ വാങ്ങിയെന്ന ആരോപണം; ഇഡി അന്വേഷണം തുടങ്ങി

കണ്ണൂർ: അഴീക്കോട് പ്ലസ് ടു ബാച്ച് അനുവദിക്കുന്നതിന് കെഎം ഷാജി എംഎൽഎ കോഴ വാങ്ങിയെന്ന ആരോപണത്തിൽ എൻഫോഴ്സ്മെന്റ് ഡയറക്ട്രേറ്റ് അന്വേഷണം തുടങ്ങി. കോഴിക്കോട് സബ് സോണൽ ഉദ്യോഗസ്ഥരാണ് കേസ് അന്വേഷിക്കുന്നത്. ചോദ്യം ചെയ്യലിനായി എംഎൽഎ അടക്കമുള്ള 30 ആളുകൾക്ക് നോട്ടീസ് നൽകിയിട്ടുണ്ട്.

Also Read: കേസെടുത്ത് പോലീസ്; കെഎം ഷാജി എംഎൽഎയ്‌ക്കെതിരായ വധഭീഷണിയിൽ അന്വേഷണം ആരംഭിച്ചു

പണം കൈമാറിയ രീതി, ചെലവഴിച്ച രീതി അടക്കമുള്ളവ ഇഡി അന്വേഷിക്കും. പരാതിക്കാരുടേയും എംഎൽഎയുടേയും ഇടപാടുകൾ സംബന്ധിച്ച വിവരം ഇഡി ശേഖരിച്ചിട്ടുണ്ട്. രണ്ട് മാസത്തിനുള്ളിൽ അന്വേഷണം പൂർത്തിയാക്കാനാണ് ഇഡിയുടെ തീരുമാനം.

പ്ലസ് ടു ബാച്ച് അനുവദിക്കുന്നതിനായി 2014 ൽ കെഎം ഷാജി എംഎൽഎക്ക് 25 ലക്ഷം രൂപ കൈക്കൂലി നൽകിയെന്നാണ് ആരോപണം. ഇതു സംബന്ധിച്ച് കണ്ണൂർ ബ്ലോക്ക് പഞ്ചായത്ത് പ്രസിഡന്റ് പത്മനാഭനാണ് പരാതി നൽകിയത്. ലീഗ് നേതൃത്വത്തിന്റെ അറിവോടെയാണ് പണം കൈമാറിയതെന്ന ആരോപണം ഉള്ളതിനാൽ നേതാക്കളും പണം കൈമാറിയെന്ന് പറയപ്പെടുന്ന ചർച്ചയിൽ പങ്കെടുത്തവരും അന്വേഷണ പരിധിയിൽ ഉണ്ട്.

Also Read: ലൈഫ് മിഷന്‍: ഇടക്കാല സ്റ്റേ നീക്കണമെന്ന സിബിഐയുടെ ഹര്‍ജി ഹൈക്കോടതി ഇന്ന് പരിഗണിക്കും

തനിക്കെതിരെയുള്ളത് രാഷ്ട്രീയ ലക്ഷ്യം വെച്ചുള്ള ആരോപണമാണെന്നാണ് കെഎം ഷാജി പറയുന്നത്. കേസ് നിലവിൽ തലശ്ശേരി വിജിലൻസ് കോടതിയുടെ പരിഗണനയിലാണ്. ഇതിനിടെയാണ് ഇഡി സാമ്പത്തിക ഇടപാട് സംബന്ധിച്ച് അന്വേഷണം നടത്തുന്നത്.