കറന്‍റ് മോഹൻ യാത്രയായി; കറന്‍റില്ലാത്ത ലോകത്തേക്ക്

കൊച്ചി: കറന്‍റ് മോഹന്‍ എന്ന പേരില്‍ സുപരിചിതനായ രാജ്മോഹന്‍ദാസ് നായര്‍(58) അന്തരിച്ചു. ഇന്നലെ വൈകീട്ട് സ്വവസതിയിലായിരുന്നു അന്ത്യം. ആരോഗ്യകരമായ കാരണങ്ങളാൽ കുറച്ചുനാളായി ചികിത്സയിലായിരുന്നു. രാജ്മോഹന്‍ദാസ് നായര്‍ എന്ന കറന്‍റ് മോഹന്‍ 230 വാള്‍ട്ട് വൈദ്യുതി ശരീരത്തിലൂടെ കടത്തിവിട്ട് അന്താരാഷ്ട്ര മാധ്യമങ്ങളിലുള്‍പ്പെടെ ശ്രദ്ധനേടിയിട്ടുണ്ട്.

കുട്ടികാലത്ത് സ്കൂള്‍ ഫീസ് അടക്കാത്തതിനെ തുടര്‍ന്ന് സ്കൂളില്‍ പ്രവേശിപ്പിക്കാത്തതില്‍ പ്രതിഷേധിച്ച്‌ വൈദ്യുതി പോസ്റ്റില്‍ കയറി കമ്പിയില്‍ പിടിച്ച്‌ ഫ്യൂസ് ഊരിപിടിച്ച ദിവസമാണ് രാജ് മോഹൻദാസ് നായർ ആ സത്യം തിരിച്ചറിഞ്ഞത്. തന്‍റെ ശരീരം മറ്റേത് ലോഹത്തെകാളും നല്ലൊരു ചാലകമാണെന്ന സത്യം.

പിന്നെ കറന്‍റ് മോഹന്‍ എന്ന വിളിപ്പേരില്‍ ലോകം മുഴുവന്‍ അത്ഭുത സിദ്ധി കാട്ടി പ്രശസ്ഥനാകുകയായിരുന്നു. ഭാര്യ രമാദേവി വിലക്കിയെങ്കിലും മരിക്കും വരെ താന്‍ കറന്‍റുമായുള്ള പ്രണയം അവസാനിപ്പിക്കില്ലെന്ന് അദ്ദേഹം പ്രഖ്യാപിച്ചു. പ്രദേശിക ചാനലുകാർ മുതല്‍ ബിബിസി, ഡിസ്കവറി വരെ കറന്‍റ് മോഹന്‍റെ വൈദ്ധ്യുത പ്രകടനം പകര്‍ത്തി ലോകം മുഴുവനും എത്തിച്ചു. പിന്നെ മോഹന് നിരവധി പുരസ്കാരങളും ആദരവും ഈ കറന്‍റ് സ്നേഹത്തിന്‍റെ പേരിൽ ലഭിക്കുകയുമുണ്ടായി.

നാട്ടുകാർക്ക് ഒരു അദ്‌ഭുത മനുഷ്യനായിരുന്നു അദ്ദേഹം. 28 വയസ്സ് മുതലാണ് ശരീരത്തിലേക്ക് വൈദ്യുതി പ്രവഹിപ്പിച്ച് ബൾബ് പ്രകാശിപ്പിച്ചത്. വിദേശരാജ്യങ്ങളിലടക്കം നിരവധി പ്രകടനങ്ങൾ കാഴ്‌ചവെച്ച അദ്ദേഹത്തെ ഒരിക്കലും ഷോക്കടിച്ചിരുന്നില്ല.