ഇടുക്കി അണക്കെട്ടിലെ ജലനിരപ്പ് കുറഞ്ഞു

വേനല്‍ കടുത്തതോടെ ഇടുക്കി അണക്കെട്ടിലെ ജലനിരപ്പ് കുറഞ്ഞു. ഡാമില്‍ ഇനി 589.398 ദശലക്ഷം യൂണിറ്റ് വൈദ്യുതി ഉല്‍പാദിപ്പിക്കാനാവശ്യമായ വെള്ളം മാത്രമാണുള്ളത്. സംസ്ഥാനത്തെ സംഭരണികളില്‍ 1265.824 ദശലക്ഷം യൂണിറ്റ് വൈദ്യുതി ഉല്‍പാദിപ്പിക്കാന്‍ ആവശ്യമായ വെള്ളമുണ്ട്.

ഇടുക്കി അണക്കെട്ടിലെ ജലനിരപ്പ് ഇന്നലെ 2326.3 അടിയായി കുറഞ്ഞു. സമുദ്രനിരപ്പില്‍ നിന്നുള്ള ഉയരമാണിത്. ഡാമിലിപ്പോള്‍ 27.439 % വെള്ളമാണ് ഉള്ളത്. ഇന്നലെ 7.196 ദശലക്ഷം യൂണിറ്റ് വൈദ്യുതി ഉല്‍പാദിപ്പിച്ചു. ഡാമിലിപ്പോള്‍ കഴിഞ്ഞ വര്‍ഷത്തേക്കാള്‍ 22.66 അടി വെള്ളം കുറവാണ്.

വെള്ളിയാഴ്ച 78.5 ദശലക്ഷം യൂണിറ്റ് വൈദ്യുതിയാണ് സംസ്ഥാനത്ത് ഉപയോഗിച്ചത്. ഇത് റെക്കോര്‍ഡാണ്. വേനല്‍ കടുത്തതോടെ ഇപ്പോള്‍ 76 ദശലക്ഷം യൂണിറ്റ് വൈദ്യുതിയാണ് ശരാശരി ഉപയോഗം. കഴിഞ്ഞ വര്‍ഷം 70 ദശലക്ഷം യൂണിറ്റ് വൈദ്യുതിയായിരുന്നു ഈ കാലയളവിലെ ഉപയോഗം. ഞായറാഴ്ച സംസ്ഥാനത്തെ ഉപയോഗം 71.7396 ദശലക്ഷം യൂണിറ്റായി കുറഞ്ഞു.