പത്തനംതിട്ടയിലും കുട്ടനാട്ടിലും വൈദ്യുതി വിതരണം നി‍ർത്തി

പത്തനംതിട്ട: മുൻകരുതൽ നടപടിയുടെ ഭാഗമായി പത്തനംതിട്ടയിലും കുട്ടനാട്ടിലും വൈദ്യുതി വിതരണം നി‍ർത്തി. അപകടങ്ങൾ ഒഴിവാക്കുന്നിതിൻെറ ഭാഗമായാണ് വൈദ്യുതി വിതരണം നിർത്തിയത്. പമ്പ, അച്ചൻകോവിൽ നദികൾ കരകവിഞ്ഞ് ഒഴുകുകയാണ്.

പത്തനംതിട്ട ജില്ലയിലെ റാന്നി, തിരുവല്ല മേഖലകൾ വൻ പ്രതിസന്ധി നേരിടുകയാണ്. ജില്ലയിലെ മിക്ക പ്രദേശങ്ങളും വെള്ളത്തിനടിയിലാണ്. റാന്നി, അത്തിക്കയം ആറൻമുള വടശേരിക്കര കോഴഞ്ചേരി പ്രദേശങ്ങളിലെ നൂറ് കണക്കിന് വീടുകളും വ്യാപാര സ്ഥാപനങ്ങളും പ്രളയക്കെടുതിയിലാണ്.

നേരത്തെ തന്നെ വെള്ളപ്പൊക്കം ദുരന്തം വിതച്ച കുട്ടനാട്ടിലും വീണ്ടും വെള്ളം കയറുകയാണ്. സമീപത്തെ റോഡുകളെല്ലാം തന്നെ വെള്ളത്തിനടിയിലാണ്.