എറണാകുളത്തെ ജ്വല്ലറികളില്‍ എന്‍ഫോഴ്‌സ്‌മെന്റ് പരിശോധന

കൊച്ചി: നോട്ട് പിന്‍വലിച്ചതിന് തൊട്ടുപിന്നാലെ ജ്വല്ലറികൾ കേന്ദ്രീകരിച്ചും അന്വേഷണം. എറണാകുളത്തെ പ്രമുഖ ജ്വല്ലറികളിലെ സിസിടിവി ദൃശ്യങ്ങള്‍ എന്‍ഫോഴ്‌സ്‌മെന്റ് അധികൃതര്‍ പരിശോധിക്കുന്നു. നോട്ട് പിന്‍വലിച്ച നവംബര്‍ എട്ട് മുതല്‍ ഇതുവരെയുള്ള ദിവസങ്ങളിലെ സിസിടിവി ദൃശ്യങ്ങളാണ് പരിശോധിക്കുന്നത്.

രാത്രി എട്ടുമണിക്കായിരുന്നു പ്രധാനമന്ത്രി നരേന്ദ്രമോഡി കള്ളപ്പണം തടയുന്നതിനായി 500, 1000 നോട്ടുകള്‍ പിന്‍വലിച്ചതായി പ്രഖ്യാപിച്ചത്. 25 പ്രധാന നഗരങ്ങളിലെ 400ലേറെ ജ്വല്ലറികളിലെ വ്യാപാരം എന്‍ഫോഴ്സ്‌മെന്റ് വിഭാഗം പരിശോധിക്കാന്‍ തീരുമാനിച്ചിട്ടുണ്ട്. ഉത്തരേന്ത്യയില്‍ ഒരു ജ്വല്ലറി 10 ഗ്രാം സ്വര്‍ണം 50,000 രൂപയ്ക്ക് വിറ്റതായി എന്‍ഫോഴ്സ്‌മെന്റ് വിഭാഗത്തിന് വിവരം ലഭിച്ചിട്ടുണ്ട്. കണക്കില്‍പ്പെടാത്ത പണം ഇതിലേറെ വില നല്‍കിയും ജ്വല്ലറികളില്‍നിന്ന് മാറ്റിയതായാണ് വിവരം.