നടന്‍ ദേവന്‍റെ അഭിമുഖം ഫോബ്‍സ്‍ വെബ്‍സൈറ്റില്‍ നിന്ന് 'അപ്രത്യക്ഷമായി'

കൊച്ചി: രാഷ്ട്രീയ പാര്‍ട്ടി രൂപീകരിച്ച നടന്‍ ദേവനെ പുകഴ്‍ത്തി എഴുതിയ പരസ്യ അഭിമുഖം നെറ്റ്‍വര്‍ക്ക് 18 പ്രസിദ്ധീകരണം ഫോബ്‍സ് മാസിക പിന്‍വലിച്ചതായി സൂചന. ഫോബ്‍സ്‍ ഇന്ത്യ വെബ്‍സൈറ്റില്‍ നവംബര്‍ അഞ്ചിന് പ്രസിദ്ധീകരിച്ച അഭിമുഖം നിലവില്‍ ലഭ്യമല്ല.

അഭിമുഖം പിന്‍വലിച്ചത് എന്തുകൊണ്ടാണെന്ന് ഫോബ്‍സ്‍ വ്യക്തമാക്കിയിട്ടില്ല. ഇത് ആവശ്യപ്പെട്ട് ഫോബ്‍സിന് അയച്ച ട്വീറ്റിനോട് മാസിക പ്രതികരിച്ചിട്ടില്ല.

Also Read: ശോഭ സുരേന്ദ്രന്‍ ബിജെപിയില്‍ വിമത നേതാവാകുമ്പോള്‍

ഫോബ്‍സില്‍ അഭിമുഖം വന്നതിന് ശേഷം കേരളത്തിലെ സോഷ്യല്‍ മീഡിയയില്‍ ട്രോളുകളും പരിഹാസങ്ങളും നിറഞ്ഞിരുന്നു. കേരളത്തില്‍ കാര്യമായ ചലനമില്ലാത്ത പുതിയ പാര്‍ട്ടിയുടെ പ്രചാരണവേലയ്‍ക്ക് ഇംഗ്ലീഷ് മാസിക തയാറായതിന് എതിരെയായിരുന്നു കൂടുതലും നര്‍മ്മ വിമര്‍ശനങ്ങള്‍. ഇതാണോ അഭിമുഖം പിന്‍വലിക്കാന്‍ കാരണം എന്ന് വ്യക്തമല്ല.

'കേരളത്തിലെ കരുത്തുറ്റ രാഷ്ട്രീയ നേതാവായി ദേവന്‍ ഉയര്‍ന്നുവരുന്നു' എന്ന തലക്കെട്ടിലാണ് ലേഖനം പ്രസിദ്ധപ്പെടുത്തിയത്. പരസ്യത്തിനായി ഉപയോഗിക്കുന്ന ബ്രാന്‍ഡ്‍ കണ്ടന്‍റ്‍ വിഭാഗത്തിലാണ് അഭിമുഖം വന്നത്.

നവംബര്‍ 12ന് ആണ് ദക്ഷിണേന്ത്യന്‍ ഭാഷകളില്‍ സജീവമായിരുന്ന നടന്‍ ദേവന്‍ ഔദ്യോഗികമായി രാഷ്ട്രീയ പാര്‍ട്ടി രൂപീകരിച്ചത്. നവകേരള പീപ്പിള്‍സ്‍ പാര്‍ട്ടി എന്നാണ് സംഘടനയുടെ പേര്. ബിജെപി അനുകൂല നയം ആണ് തന്‍റെതെന്ന് തുറന്നുപറഞ്ഞ ദേവന്‍, പക്ഷേ, ബിജെപിയില്‍ ചേരില്ലെന്നും മാധ്യമപ്രവര്‍ത്തകരോട് പറഞ്ഞിരുന്നു.

Also Read: ഒവൈസി ബംഗാള്‍ പിടിച്ചാല്‍ നേട്ടം ബിജെപിക്ക്?

ഫോബ്‍സ്‍ മാധ്യമപ്രവര്‍ത്തകര്‍ അല്ല അഭിമുഖം തയാറാക്കിയത്. ദ്രൗപതി തമ്പി എന്ന മാധ്യമപ്രവര്‍ത്തകയുടെ അഭിമുഖം പുനപ്രസിദ്ധീകരിക്കുകയായിരുന്നു മാസിക. ഉള്ളടക്കത്തില്‍ ഉത്തരവാദിത്തമില്ലെന്ന് മാസിക വ്യക്തമാക്കിയിരുന്നു.

അമേരിക്കന്‍ ധനകാര്യ മാസികയാണ് ഫോബ്‍സ്‍. ഇന്ത്യയില്‍ ഇത് നിയന്ത്രിക്കുന്നത് റിലയന്‍സ് ഗ്രൂപ്പ് കമ്പനിയായ നെറ്റ് വര്‍ക്ക് 18 ആണ്.