ഇ പി ജയരാജന്റെ സത്യപ്രതിജ്ഞ ചിങ്ങം ഒന്നിന്

തിരുവനന്തപുരം : വീണ്ടും മന്ത്രിയാകാൻ ഒരുങ്ങുന്ന ഇ പി ജയരാജന്റെ സത്യപ്രതിജ്ഞ ചിങ്ങം ഒന്നിനു നടത്താന്‍ സിപിഎമ്മില്‍ ധാരണയായതായി സൂചന. അദ്ദേഹത്തിനു വ്യവസായ വകുപ്പ് തന്നെ ലഭിക്കുമെന്നും സൂചനയുണ്ട്. അമേരിക്കയിലേക്കു പോകുന്ന മുഖ്യമന്ത്രി പിണറായി വിജയന്റെ അഭാവത്തിൽ അദ്ദേഹത്തിന്റെ ചുമതലകളും ജയരാജൻ നിര്‍വ്വഹിക്കുമെന്നാണറിയുന്നത്.

ചിങ്ങം ഒന്ന് കണക്കാക്കി സത്യപ്രതിജ്ഞക്കുളള ഒരുക്കങ്ങള്‍ നടത്താന്‍ സിപിഎം നേതൃത്വം നിര്‍ദ്ദേശം നല്‍കിക്കഴിഞ്ഞു. ഈ മാസം 19നാണ് മുഖ്യമന്ത്രി പിണറായി വിജയന്‍ ചികില്‍സക്കായി അമേരിക്കയിലേക്കു പോകുന്നത്. അതിനു മുന്‍പ് ജയരാജനെ മന്ത്രിസഭയിലെത്തിക്കാനാണു പെട്ടെന്നുള്ള നീക്കങ്ങള്‍.

നാളെ സംസ്ഥാന സമിതിക്കും തിങ്കളാഴ്ച ഇടതു ഇടതുമുന്നണിക്കും ശേഷം തൊട്ടടുത്ത ദിവസങ്ങളില്‍ സത്യപ്രതിജ്ഞ നടത്താനായിരുന്നു നേരത്തേയുള്ള തീരുമാനം. എന്നാല്‍ എന്നാല്‍ കര്‍ക്കിടകം അവസാനിച്ചിട്ടുമതി എന്ന അഭിപ്രായങ്ങള്‍ ഉയര്‍ന്നതോടെയാണ് ഈ മാസം പതിനേഴിനോ പതിനെട്ടിനോ സത്യപ്രതിജ്ഞയെന്ന ധാരണയിലെത്തിയത്.