ബന്ധു നിയമനം; ജലീലിന്റെ നിലപാട് ശരിയെന്ന് ഇ പി ജയരാജൻ

കണ്ണൂർ: കെ ടി ജലീലിനെതിരെ ഉയർന്ന ബന്ധു നിയമന വിവാദം അടിസ്ഥാന രഹിതമെന്ന് മന്ത്രി ഇ പി ജയരാജൻ. ബന്ധുവായതിനാൽ ഏതെങ്കിലും ഉദ്യോഗസ്ഥന് ഡെപ്യൂട്ടേഷനിൽ പോകാൻ പാടില്ലെന്നുണ്ടോയെന്നും ജയരാജൻ ചോദിച്ചു. വിഷയത്തെ തെറ്റായി വ്യാഖ്യാനിച്ച് തെറ്റിദ്ധാരണ പടർത്തുകയാണെന്നും ഇക്കാര്യത്തിൽ ജലീലിന്റെ നിലപാട് ശരിയാണെന്നും വ്യവസായ മന്ത്രി വ്യക്തമാക്കി.

അതേസമയം സംസ്ഥാന ന്യൂനപക്ഷ വികസന-ധനകാര്യ കോർപ്പറേഷനിൽ ബന്ധുവിനെ നിയമിച്ചതു സംബന്ധിച്ച് കെ ടി ജലീൽ നൽകിയ വിശദീകരണം വിശ്വാസയോഗ്യമല്ലെന്ന് ബിജെപി വ്യക്തമാക്കി. യോഗ്യരായവരെ ലഭിക്കാത്തതിനാലാണ് ബന്ധുവിനെ നിയമിച്ചത് എന്നുള്ള മന്ത്രിയുടെ പ്രസ്താവന സംസ്ഥാനത്തെ വിദ്യാസമ്പന്നരായ തൊഴിൽ രഹിതരെ ആക്ഷേപിക്കുന്നതിനു തുല്ല്യമാണെന്ന് ബിജെപി വക്താവ് എം എസ് കുമാർ പറഞ്ഞു.

പത്ര പരസ്യം നൽകിയാണ് നിയമനം നടത്തിയതെന്ന് ആദ്യം പറഞ്ഞ മന്ത്രി പിന്നീട് പത്രത്തിൽ വാർത്ത കൊടുത്തുവെന്നാണ് പറഞ്ഞത്. അഭിമുഖത്തിനെത്തിയ ഏഴുപേർക്കും യോഗ്യത ഇല്ലായിരുന്നുവെന്നും മന്ത്രി ജലീൽ വ്യക്തമാക്കിയിരുന്നു. അപേക്ഷകരിൽനിന്നും യോഗ്യരെ മാത്രം അഭിമുഖത്തിനു വിളിക്കാന്നതാണ് രീതി. എന്നാൽ എന്തിന് അയോഗ്യരെ അഭിമുഖത്തിനു വിളിച്ചുവെന്ന് വ്യക്തമാക്കണമെന്നും ബിജെപി ആവശ്യപ്പെട്ടു. ബന്ധു നിയമനം മന്ത്രി സമ്മതിച്ച സാഹചര്യത്തിൽ ഇ പി ജയരാജൻ കാണിച്ച മാതൃക ജലീൽ കാണിക്കണമെന്നും കുമാർ പറഞ്ഞു.