സൗമ്യയെ തള്ളിയിട്ടതിന് തെളിവുകള്‍ ഉണ്ട്: ഡോ ഷെര്‍ളി വാസു

കോഴിക്കോട്: സൗമ്യയെ ട്രെയ്‍നില്‍ നിന്ന് തള്ളിയിട്ടതിന് തെളിവുകള്‍ ഉണ്ടെന്ന് മൃതദേഹം പോസ്റ്റ്‍മോര്‍ട്ടം ചെയ്ത ഡോക്ടര്‍ ഷെര്‍ളി. സൗമ്യയുടെ നെറ്റിയിൽ ട്രെയിനിന്‍റെ വാതിലിൽ തല ശക്തിയായി ഇടിപ്പിച്ചതിനെ തുടര്‍ന്നുള്ള ആറു മുറിവുകൾ കണ്ടെത്തിയിരുന്നു. കൈകൾ വാതിലിനിടയിൽ അമർത്തി ക്ഷതമേൽപ്പിച്ചതിന്‍റെ മുറിവുകളും സൗമ്യയുടെ ദേഹത്ത് ഉണ്ടായിരുന്നു. ബോധം ഭാഗികമായി നഷ്ടപ്പെട്ട സൗമ്യയെ ട്രെയ്‍നില്‍ നിന്ന് തള്ളിയിട്ടതാണ് എന്ന് തെളിയിക്കാന്‍ ഈ തെളിവുകള്‍ മതിയെന്ന് സുപ്രീം കോടതിയുടെ പരാമര്‍ശത്തോട് പ്രതികരിക്കവെ ഡോ.ഷെര്‍ളി പറഞ്ഞു.

പേടിച്ച് പുറത്തേക്ക് ചാടിയതാണെങ്കില്‍ മുറിവുകളുടെ സ്വഭാവം മറ്റൊന്ന് ആകുമായിരുന്നു. കൂടാതെ ഗോവിന്ദച്ചാമിയുടെ ചർമത്തിന്‍റെ ഭാഗങ്ങൾ സൗമ്യയുടെ നഖത്തിനുള്ളിൽനിന്ന് ലഭിച്ചിരുന്നുവെന്നും സൗമ്യയുടെ ശരീരത്തില്‍ നിന്ന് ലഭിച്ച ബീജം പരിശോധനയില്‍ ഗോവിന്ദച്ചാമിയുടെ ഡിഎന്‍എയോട് യോജിച്ചു എന്നും അവര്‍ കൂട്ടിച്ചേര്‍ത്തു.

ശരീരത്തിലെ മുറിവുകളുടെ ചിത്രങ്ങള്‍ കോടതിയില്‍ സമര്‍പ്പിച്ച റിപ്പോര്‍ട്ടില്‍ ഉള്‍പെടുത്തിയിരുന്നുവെന്നും വിവരങ്ങളെല്ലാം വിചാരണ കോടതിയിലെ സാക്ഷി വിസ്താരത്തില്‍ വ്യക്തമാക്കിയിരുന്നുവെന്നും ഡോ. ഷെര്‍ളി വാസു അറിയിച്ചു.