ബ്രൂവറിയുമായി ബന്ധപ്പെട്ട പത്രക്കുറിപ്പ് വ്യാജമെന്ന് എക്സൈസ്

തിരുവനന്തപുരം: ബ്രൂവറിയുമായി ബന്ധപ്പെട്ട് പ്രചരിക്കുന്ന വിവാദ പത്രക്കുറിപ്പ് വ്യാജമെന്ന് എക്സൈസ് വകുപ്പ്. പ്രതിപക്ഷനേതാവിന് മറുപടിയുമായി പുറത്തിറങ്ങിയ പത്രക്കുറിപ്പ് കൃതിമമാണെന്ന് വകുപ്പ് വ്യക്തമാക്കി. തന്‍റെ അറിവോ അനുമതിയോ ഇല്ലാതെയാണ് പത്രക്കുറിപ്പ് പ്രചരിച്ചതെന്ന് എക്സൈസ് അഡീഷണല്‍ ചീഫ് സെക്രട്ടറി ആശാ തോമസ് പറഞ്ഞു. ഇതുസംബന്ധിച്ച് വകുപ്പുതല അന്വേഷണത്തിന് എക്സൈസ് ഡെപ്യൂട്ടി സെക്രട്ടറിയെ ചുമതലപ്പെടുത്തിയതായും അവര്‍ അറിയിച്ചു.

സംഭവത്തെക്കുറിച്ച് അന്വേഷിക്കണമെന്ന് ആവശ്യപ്പെട്ട് അഭ്യന്തരവകുപ്പിന് കത്ത് നല്‍കിയിട്ടുണ്ട്. പത്രക്കുറിപ്പുമായി യാതൊരു ബന്ധവുമില്ലെന്ന് എക്സൈസ് കമ്മീഷണറേറ്റും അറിയിച്ചു. എക്സൈസ് ആസ്ഥാനത്ത് നിന്ന് ഇത്തരമൊരു പത്രക്കുറിപ്പ് ഇറക്കിയിട്ടില്ല. എക്സൈസ് കമ്മീഷണര്‍ ഒപ്പിട്ടുനല്‍കിയ പത്രക്കുറിപ്പില്‍ പ്രതിപക്ഷ നേതാവിനെതിരെ പരാമര്‍ശങ്ങളില്ലായിരുന്നുവെന്നും കമ്മീഷണറേറ്റ് വ്യക്തമാക്കി.