മലയാള സിനിമയില്‍ ഇന്‍കം ടാക്‌സ് റെയ്ഡ് വന്നാല്‍ പിണറായി ഭരിക്കുന്ന കേരളമാണെന്ന് വിരട്ടിയാല്‍ മതി: സന്ദീപ് വാര്യര്‍

കോഴിക്കോട്: തമിഴ് ചലച്ചിത്ര താരം വിജയിയെ ആദായ നികുതി വകുപ്പ് കസ്റ്റഡിയിലെടുത്ത് ചോദ്യം ചെയ്യുന്നതിനെ തുടര്‍ന്ന് മലയാള സിനിമാ പ്രവര്‍ത്തകര്‍ക്ക് മുന്നറിയിപ്പുമായി യുവമോര്‍ച്ച സംസ്ഥാന സെക്രട്ടറി സന്ദീപ് ജി വാര്യര്‍. ഫേസ്ബുക്കിലൂടെയാണ് മുന്നറിയിപ്പ് പോസ്റ്റുമായി സന്ദീപ് രംഗത്തെത്തിയിരിക്കുന്നത്.

സംസ്ഥാന മുഖ്യമന്ത്രി പിണറായി വിജയനെ പരിഹസിച്ചുകൊണ്ടാണ് സന്ദീപിന്റെ പോസ്റ്റ്. മലയാള സിനിമാ പ്രവര്‍ത്തകര്‍ക്കെതിരെ ഇന്‍കം ടാക്‌സ് റെയ്ഡ് വന്നാല്‍ പിണറായി ഭരിക്കുന്ന കേരളമാണെന്ന് പറഞ്ഞു വിരട്ടിയാല്‍ മതിയെന്നാണ് സന്ദീപിന്റെ ഫേസ്ബുക്ക് പോസ്റ്റ്.

സന്ദീപ് ജി വാര്യരുടെ ഫേസ്ബുക്ക് പോസ്റ്റ്:


'ഇന്‍കം ടാക്‌സ് ആക്ട് രാജ്യത്തിന് മുഴുവന്‍ ബാധകമായിരിക്കുന്ന നിയമമാണ്. എന്നിരുന്നാലും മലയാള സിനിമ പ്രവര്‍ത്തകര്‍ക്കെതിരെ ഇന്‍കം ടാക്‌സ് റെയ്ഡ് വരികയാണെങ്കില്‍ ഇത് പിണറായി ഭരിക്കുന്ന കേരളമാണ് എന്നു പറഞ്ഞ് വിരട്ടിയേര്. ഐടി ഉദ്യോഗസ്ഥര്‍ പേടിച്ച് കണ്ടം വഴി ഓടിക്കോളും', സന്ദീപ് വാര്യര്‍ ഫേസ്ബുക്കില്‍ പങ്കുവെച്ചു.

വിജയ്‌ക്കെതിരായുള്ള നടപടിയില്‍ പ്രതിഷേധിച്ച് നിരവധി രാഷ്ട്രീയ നേതാക്കള്‍ രംഗത്തെത്തിയതിനിടെയാണ് സന്ദീപ് വാര്യരുടെ പരാമര്‍ശം. രാഷ്ട്രീയ പ്രസ്താവനകള്‍ നടത്തുന്ന സിനിമാക്കാര്‍ക്ക് മുന്നറിയിപ്പുമായി സന്ദീപ് വാര്യര്‍ ഇതിനു മുമ്പും രംഗത്തെത്തിയിട്ടുണ്ട്. വരുമാന നികുതി കൃത്യമായി അടച്ചെന്ന് ഉറപ്പ് വരുത്തണമെന്നും പ്രത്യേകിച്ച് നടിമാര്‍ അത് ഉറപ്പുവരുത്തണമെന്നുമാണ് സന്ദീപ് മുന്നറിയിപ്പ് നല്‍കിയിരുന്നത്.