എയർ പോർട്ട് അതോറിറ്റിയുടെ പേരിൽ കൊച്ചിയിൽ ജോലിതട്ടിപ്പ്

കൊച്ചി: എയർ പോർട്ട് അതോറിറ്റിയുടെ പേരിൽ ജോലിതട്ടിപ്പ് നടത്തുന്ന റാക്കറ്റിനെ പൊലീസ് പിടികൂടി. കൊച്ചിയിലെ ഹയാത്ത് ഹോട്ടലിൽ ഇൻ്റർവ്യൂ സംഘടിപ്പിച്ച നാലംഗ സംഘത്തെയാണ് കൊച്ചി എസിപി ലാൽജിയുടെ നേതൃത്വത്തിൽ പിടികൂടിയത്. എയർ പോർട്ട് അതോറിറ്റിയുടെ പരാതിയിലായിരുന്നു അന്വേഷണം. ഒരു സംഘമാളുകൾ ഹോട്ടലിൽ വെച്ച് എയർപോർട്ടിലേക്ക് ആളുകളെയെടുക്കുന്നുവെന്ന് കാണിച്ചാണ് പരാതി എത്തിയത്.

ഇന്റർവ്യൂവിനെത്തിയ ഉദ്യോഗാർഥികളിലൊരാൾ ഏവിയേഷൻ വിഭാഗത്തിൽ ജോലി ചെയ്യുന്ന സുഹൃത്തുക്കളോട് തിരക്കിയപ്പോഴാണ് ജോലിതട്ടിപ്പിനെക്കുറിച്ച് വ്യക്തമായത്. പിടികൂടിയവരുടെ അറസ്റ്റ് രേഖപ്പെടുത്തിയിട്ടില്ലെന്നും, തട്ടിപ്പിൻ്റെ വ്യാപ്തി അറിയുന്നതിന് കൂടുതൽ അന്വേഷണം ആവശ്യമാണെന്ന് പൊലീസ് പറഞ്ഞു.