ഓണാവധി വെട്ടിക്കുറച്ചിട്ടില്ല; പ്രചരിക്കുന്നത് വ്യാജ വാര്‍ത്ത

ഓണാവധി വെട്ടിക്കുറച്ചതായി സാമൂഹ്യമാധ്യമങ്ങളില്‍ പ്രചരിക്കുന്ന സന്ദേശങ്ങള്‍ അടിസ്ഥാന രഹിതമെന്ന് പൊതുവിദ്യാഭ്യാസ ഡയറക്ടറുടെ ഓഫീസ‌് അറിയിച്ചു. വിദ്യാലയങ്ങളില്‍ ഓണാവധി പത്ത് ദിവസം തന്നെ ലഭിക്കുമെന്നും അതിൽ യാതൊരു വിധത്തിലുള്ള മാറ്റവും വരുത്തിയിട്ടില്ലെന്നും പൊതുവിദ്യാഭ്യാസ ഡയറക്ടറുടെ ഓഫീസ‌് വ്യക്തമാക്കി. മുൻ നിശ്ചയ പ്രകാരം ഓഗസ്റ്റ് 20ന‌് വൈകിട്ട‌് ഓണാവധിക്കായി സ‌്കൂളുകള്‍ അടയ്ക്കുകയും 30ന‌് തുറക്കുകയും ചെയ്യും.

മഴക്കെടുതി മൂലം ഏറെ ക്ലാസുകൾ നഷ്ടപ്പെട്ടതിനാല്‍ ഓണാവധി 24, 25, 26 എന്നിങ്ങനെ മൂന്നു ദിവസങ്ങളായി വെട്ടിച്ചുരുക്കിയെന്നാണ‌് സാമൂഹ്യ മാധ്യമങ്ങളിൽ പ്രചരിക്കുന്നത്. ഈ വ്യാജ സന്ദേശങ്ങളുടെ ഉറവിടം കണ്ടെത്തി ശക്തമായ നടപടി സ്വീകരിക്കണമെന്ന‌് കാട്ടി പൊതു വിദ്യാഭ്യാസ ഡയറക്ടര്‍ കെ വി മോഹന്‍ കുമാര്‍ തിങ്കളാഴ‌്ച പോലീസ‌് സൈബര്‍ സെല്ലില്‍ പരാതി സമര്‍പ്പിക്കും.