വിവാഹത്തലേന്ന്​ മകളെ പിതാവ്​ കുത്തിക്കൊന്നു

മലപ്പുറം: വിവാഹത്തലേന്ന് പിതാവ് മകളെ കുത്തിക്കൊന്നു. അരീക്കോട് പുവ്വത്തിക്കണ്ടിയിൽ വ്യാഴാഴ്ച വൈകീട്ട് അഞ്ചരയോടെയായിരുന്നു സംഭവം. ചാലത്തിങ്ങൽ രാജനാണ് മകൾ ആതിരയെ (22) കുത്തിക്കൊന്നത്. മകൾ പിന്നാക്ക ജാതിയിൽപെട്ട യുവാവിനെ പ്രണയിച്ചതിലുള്ള ദേഷ്യമാണ് കൊലപാതകത്തിലേക്ക് നയിച്ചത്. സംഭവവുമായി ബന്ധപ്പെട്ട് ആതിരയുടെ അച്ഛന്‍ രാജനെ പോലീസ് കസ്റ്റഡിയിലെടുത്തിട്ടുണ്ട്.

സൈനികനായ കൊയിലാണ്ടിയിലെ ഒരു യുവാവുമായി ആതിര പ്രണയത്തിലായിരുന്നു. നാളെ ഇരുവരും വിവാഹിതരാവാനും തീരുമാനിച്ചിരുന്നു. തുടക്കത്തിൽ വിവാഹത്തിന് അച്ഛന്‍റെ സമ്മതമില്ലായിരുന്നെങ്കിലും മധ്യസ്ഥ ശ്രമങ്ങൾക്കൊടുവിൽ പിന്നീട് സമ്മതിച്ചിരുന്നു. എന്നാൽ ഇതുമായി ബന്ധപ്പെട്ട് ആതിരയുമായി വിവാഹത്തലേന്ന് വീണ്ടും തർക്കമുണ്ടായി. തർക്കത്തിനിടെ ഒാടി രക്ഷപ്പെടാൻ ശ്രമിച്ച ആതിരയെ പിറകെ ഒാടി രാജൻ കുത്തിക്കൊല്ലുകയായിരുന്നുവെന്നാണ് ദൃക്സാക്ഷികൾ മൊഴി നൽകിയിരിക്കുന്നത്.