മണിയുടെ മരണം: രാസവസ്തു അടങ്ങിയ കുപ്പികൾ കണ്ടെത്തി

തൃശൂർ: കലാഭവൻ മണിയുടെ പാടിയിലെ ഔട്ട്ഹൗസിനു സമീപത്ത് നിന്ന് പ്ലാസ്റ്റിക് കുപ്പികൾ കണ്ടെത്തി. കീടനാശിനി അടങ്ങിയ കുപ്പിയാണിതെന്ന് കരുതുന്നു. ഈ കുപ്പികളിൽ രാസവസ്തുക്കളുടെ സാന്നിധ്യം കണ്ടെത്തിയിട്ടുണ്ട്. പാടിയിലെ പരിശോധന ഇപ്പോഴും തുടരുകയാണ്. അതേസമയം പാടിയിലെ ജാതിമരങ്ങൾക്ക് കീടനാശിനി ഉപയോഗിച്ചിട്ടില്ലെന്ന് പോലീസ് കണ്ടെത്തിയിട്ടുണ്ട്. മണിയുടെ ശരീരത്തിൽ കണ്ടെത്തിയ ക്ലോർപൈറിഫോസ് എവിടെ നിന്ന് കൊണ്ടുവന്നു എന്നാണ് പോലീസ് ഇപ്പോൾ അന്വേഷിക്കുന്നത്.

ഔട്ട്ഹൗസിന് സമീപം കട നടത്തുന്ന മണികണ്ഠൻ എന്നയാൾ പോലീസിന് നിർണായക മൊഴി നൽകിയിട്ടുണ്ട്. അരുണും വിപിനും മുരുകനും ചേർന്നാണ് പാടി വൃത്തിയാക്കിയത്. എല്ലാം പോലീസിനെ അറിയിച്ചിട്ടുണ്ടെന്നും പാടിയിൽ രാത്രി വൈകിയും മദ്യ സൽക്കാരം നടത്തിയിരുന്നുവെന്നും മണികണ്ഠൻ മൊഴി നൽകിയിട്ടുണ്ട്.

അതേസമയം പാടിയില്‍ ചാരായം എത്തിച്ച ജോമോന്‍ വിദേശത്തേക്ക്‌ കടന്നുവെന്ന്‌ പോലീസ്‌ അറിയിച്ചു. ഇയാളെ നാട്ടില്‍ തിരിച്ചെത്തിക്കാനുള്ള നടപടികള്‍ തുടങ്ങിയതായും പോലീസ്‌ പറഞ്ഞു.