നിരോധനം ലംഘിച്ചാൽ പിഴ
ആദ്യ നിയമ ലംഘനത്തിന് 10,000 രൂപയാണ് പിഴ നൽകേണ്ടത്. തുടർന്നും പിടിക്കപ്പെട്ടാൽ 25,000 രൂപയാണ് പിഴ. മൂന്നാം തവണയും ലംഘനം ഉണ്ടായാൽ 50,000 രൂപ പിഴ നൽകേണ്ടിവരും. മൂന്ന് തവണ ഒരേ സ്ഥാപനം നിയമം ലംഘിക്കുകയാണെങ്കിൽ നിർമ്മാണ അനുമതിയും പ്രവർത്തന അനുമതിയും റദ്ദാക്കപ്പെടും. കലക്ടർ, സബ് കലക്ടർ, തദ്ദേശ സ്വയംഭരണ സ്ഥാപനങ്ങൾ, ആരോഗ്യ വകുപ്പ്, മലിനീകരണ നിയന്ത്രണ ബോർഡ് ഉദ്യോഗസ്ഥർക്കാണ് ഉദ്യോഗസ്ഥർക്കാണ് നിരോധനം നടപ്പാക്കാനുള്ള ചുമതല.
നിരോധിച്ച പ്ലാസ്റ്റിക്ക് ഉത്പന്നങ്ങൾ
പ്ലാസ്റ്റിക്ക് ക്യാരീ ബാഗ്, ടേബിളിൽ വിരിക്കുന്ന പ്ലാസ്റ്റിക്ക് ഷീറ്റ്, കൂളിങ് ഫിലിം, തെർമോക്കോൾ, സ്റ്റൈറോ ഫോം ഉപയോഗിച്ചുള്ള അലങ്കാര വസ്തുക്കൾ, ഒറ്റത്തവണ ഉപയോഗിക്കുന്ന പ്ലാസ്റ്റിക്ക് കപ്പുകൾ, പ്ലേറ്റ്, സ്പോൺ, ഫോർക്ക്, സ്ട്രോ, ഡിഷ്, പ്ലാസ്റ്റിക്ക് കോട്ടിങ്ങുള്ള പേപ്പർ കപ്പുകൾ, നോൺ വൂവൺ ബാഗ്, പ്ലാസ്റ്റിക്ക് ഫ്ലാഗുകൾ, പ്ലാസ്റ്റിക്ക് ബണ്ടിങ്, പ്ലാസ്റ്റിക്ക് വാട്ടർ പൗച്ച്, പ്ലാസ്റ്റിക്ക് ജ്യൂസ് പാക്കറ്റുകൾ, കുടിക്കാനുള്ള പെറ്റ് ബോട്ടിലുകൾ, ഗാർബേജ് ബാഗുകൾ, പിവിസി ഫ്ലക്സ് മെറ്റീരിയലുകൾ, പ്ലാസ്റ്റിക്ക് പാക്കറ്റുകൾ.
പരിസ്ഥിതി സൗഹൃദ വസ്തുക്കൾക്ക് പ്രോത്സാഹനം
പ്ലാസ്റ്റിക്ക് ബാഗുകൾക്ക് പകരം പരിസ്ഥിതി സൗഹൃദ ബാഗുകൾ ഉത്പാദിപ്പിക്കുന്ന യൂണിറ്റുകളെ സർക്കാർ പ്രോത്സാഹിപ്പിക്കും. കയറ്റുമതിക്കായി പ്ലാസ്റ്റിക്ക് വസ്തുക്കൾ, ആരോഗ്യ രംഗത്ത് ഉപയോഗിക്കുന്ന പ്ലാസ്റ്റിക്ക് വസ്തുക്കൾ, കബോസ്റ്റബിൾ പ്ലാസ്റ്റിക്കിൽ നിർമ്മിച്ച വസ്തുക്കളെ നിരോധനത്തിൽ നിന്നും ഒഴിവാക്കിയിട്ടുണ്ട്. പ്ലാസ്റ്റിക്ക് വസ്തുക്കളുടെ നിരോധനവുമായി ബന്ധപ്പെട്ട് സർക്കാർ വിദഗ്ദ സമിതിയെ നിയോഗിച്ചിരുന്നു. സമിതിയുടെ ശുപാർശയുടെ അടിസ്ഥാനത്തിലാണ് പ്ലാസ്റ്റിക്ക് നിരോധിക്കാൻ സർക്കാർ തീരുമാനിച്ചത്.
ബദലുകൾ എന്തൊക്കെ
പ്ലാസ്റ്റിക്ക് കാരീ ബാഗുകൾക്ക് പകരം തുണി സഞ്ചികൾ, പേപ്പർ സഞ്ചികൾ എന്നിവ പ്രോത്സാഹിപ്പിക്കും. പ്ലാസ്റ്റിക്ക് പാത്രങ്ങൾക്ക് പകരമായി പാള, ഇല എന്നിവയിൽ നിർമ്മിച്ച ഇപ്പോൾ വിപണിയിൽ ലഭ്യമാണ്. പേപ്പറിൽ നിർമ്മിച്ച സ്ട്രോകൾ ഇതിനോടകം ലഭ്യമായിട്ടുണ്ട്.