രാജ്യത്തെ മത്സ്യബന്ധനമേഖല പ്രതിസന്ധിയിൽ: രാഹുൽ

ആലപ്പുഴ: കോൺഗ്രസ് സര്‍ക്കാര്‍ അധികാരത്തിൽ വന്നാൽ മത്സ്യത്തൊഴിലാളികളുടെ ക്ഷേമത്തിനായി പുതിയ മന്ത്രാലയം രൂപവത്കരിക്കുമെന്ന് ഉറപ്പ് നല്‍കി കോൺഗ്രസ് അധ്യക്ഷൻ രാഹുൽ ഗാന്ധി.കര്‍ഷകരെപ്പോലെ മത്സ്യത്തൊഴിലാളികളും പ്രതിസന്ധിയിലാണെന്നും എന്നാൽ കേരളത്തിൽ ഒരു സഹായം ആവശ്യം വന്നപ്പോള്‍ ഓടിയെത്തിയ മത്സ്യത്തൊഴിലാളികളെ അഭിവാദ്യം ചെയ്യുന്നുവെന്നും രാഹുൽ ഗാന്ധി പറഞ്ഞു. ആലപ്പുഴയിൽ മത്സ്യത്തൊഴിലാളികള്‍ക്ക് നല്‍കിയ സ്വീകരണച്ചടങ്ങിൽ സംസാരിക്കുകയായിരുന്നു അദ്ദേഹം.

ഓഖി ദുരന്തത്തിൽ സര്‍വതും നഷ്ടപ്പെട്ടവരാണ് മത്സ്യത്തൊഴിലാളികള്‍. അവര്‍ക്ക് ലഭിച്ച സഹായങ്ങളിൽ താൻ തൃപ്തനല്ലെന്ന് പറയാൻ ആഗ്രഹിക്കുന്നുവെന്നും രാഹുൽ പറഞ്ഞു. അത്രത്തോളം നാശനഷ്ടമാണ് മത്സ്യത്തൊഴിലാളികള്‍ നേരിട്ടതെന്നും അദ്ദേഹം ചൂണ്ടിക്കാട്ടി.

70000 പേരെയാണ് മത്സ്യത്തൊഴിലാളികള്‍ പ്രളയത്തിൽ നിന്ന് രക്ഷപെടുത്തിയതെന്നും ഭാവിയിൽ രക്ഷാദൗത്യങ്ങളിൽ തീരസേനകള്‍ മത്സ്യത്തൊഴിലാളികളുടെ സേവനം കൂടി പ്രയോജനപ്പെടുത്തണമെന്നും രാഹുൽ ഗാന്ധി പറഞ്ഞു.