രക്ഷാപ്രവർത്തനത്തിന് പോകുന്നവർക്ക് കർശന നിർദേശം

തിരുവനന്തപുരം: ഓഖി ചുഴലിക്കാറ്റിൽ പെട്ടുപോയവരെ രക്ഷപെടുത്താനായി പോകുന്ന മത്സ്യത്തൊഴിലാളികൾക്ക് തിരുവനന്തപുരം ജില്ലാ കളക്ടർ കർശന നിർദേശങ്ങൾ നൽകി. സർക്കാർ നടത്തുന്ന രക്ഷാപ്രവർത്തനങ്ങൾ ഇപ്പോഴും ഫലപ്രദമല്ലെന്ന വാദം ഉയരുന്നതിനിടെയാണ് മൽസ്യത്തൊഴിലാളികളിൽ ചിലർ കടലിൽ ഉള്ളവരെ തിരികെ കൊണ്ടുവരാനായി പോകുമെന്ന് അറിയിച്ചത്.

ഇപ്പോഴത്തെ സാഹചര്യത്തിൽ ആരും മൽസ്യബന്ധനം നടത്തരുതെന്ന് ജില്ലാ കളക്ടർ കെ.വാസുകി കർശന നിർദേശം നൽകി. രക്ഷാപ്രവർത്തനത്തിന് പോകുന്നവർ രണ്ട് നോട്ടിക്കൽ മൈൽ ദൂരത്തിനപ്പുറത്തേക്ക് പോകരുതെന്ന് കളക്ടർ നിർദേശിച്ചു. പോകുന്നവർ കോസ്റ്റ് പൊലീസിന് കൃത്യമായ വിവരം നൽകണം. ഇനി 110 പേരെ കൂടി കടലിൽ നിന്ന് രക്ഷപെടുത്താനുണ്ടെന്ന് കളക്ടർ അറിയിച്ചു.

അടുത്ത 48 മണിക്കൂറിനുള്ളിൽ കേരളത്തിൽ ശക്തമായ മഴ ഉണ്ടാകുമെന്നാണ് കാലാവസ്ഥാ നിരീക്ഷണ കേന്ദ്രം നൽകുന്ന മുന്നറിയിപ്പ്. തീരപ്രദേശങ്ങളിൽ താമസിക്കുന്നവർക്ക് സർക്കാർ അതീവ ജാഗ്രതാ നിർദേശം നൽകിയിട്ടുണ്ട്. 65 കിലോമീറ്റർ വരെ വേഗതയിൽ കേരളതീരത്ത് കാറ്റടയ്ക്കാനും സാധ്യതയുണ്ട്.