നാളെ മുതൽ മൽസ്യത്തൊഴിലാളികൾ പണി മുടക്കും

തിരുവനന്തപുരം: ഡീസല്‍ വില വര്‍ധനവില്‍ പ്രതിഷേധിച്ച് സംസ്ഥാനത്ത് നാളെ മുതല്‍ മത്സ്യബന്ധന ബോട്ടുകള്‍ അനിശ്ചിതകാല പണിമുടക്ക് ആരംഭിക്കും. ബോട്ട് ഓണേഴ്‍സ് അസോസിയേഷന്‍റെയും മത്സ്യ തൊഴിലാളി സംഘടനകളുടെയും നേതൃത്വത്തിലാണ് പണിമുടക്ക്. സംസ്ഥാനത്തെ മുഴുവന്‍ ഹാര്‍ബറുകളും നാളെ മുതല്‍ അടച്ചിടുമെന്ന് ഭാരവാഹികള്‍ അറിയിച്ചു.

ഡീസല്‍ വില കുതിച്ചുയരുന്ന സാഹചര്യത്തില്‍ മത്സ്യ ബന്ധന യാനങ്ങള്‍ക്ക് ഡീസല്‍ സബ്‌സിഡി ഏര്‍പ്പെടുത്തുക, ചെറു മത്സ്യങ്ങളെ പിടിക്കുന്നതിന്‍റെ പേരില്‍ ചുമത്തുന്ന അമിതമായ പിഴ ഒഴിവാക്കുക, തുടങ്ങി ഏഴോളം ആവശ്യങ്ങള്‍ ഉന്നയിച്ചാണ് പണിമുടക്ക്.

കടലില്‍ മത്സ്യ ബന്ധനം നടത്തി കൊണ്ടിരിക്കുന്ന മുഴുവന്‍ ബോട്ടുകളും ഇന്ന് വൈകിട്ടോടെ തീരത്തെത്തിക്കണമെന്ന് ബോട്ട് ഓണേഴ്‌സ് അസോസിയേഷന്‍ അറിയിച്ചു. ഡീസല്‍ വില വര്‍ധനവില്‍ പ്രതിഷേധിച്ച് കഴിഞ്ഞ മാസവും വിവിധ മത്സ്യ തൊഴിലാളി സംഘടനകള്‍ പണിമുടക്ക് നടത്തിയിരുന്നു.