നീണ്ടകരയിൽ മത്സ്യബന്ധന വള്ളം മുങ്ങി മൂന്ന് പേരെ കാണാതായി

കൊല്ലം: ശക്തമായ കാറ്റിലും മഴയിലും അകപ്പെട്ട് മത്സ്യബന്ധനത്തിന് പോയ വള്ളം മുങ്ങി മൂന്ന് പേരെ കാണാതായി. കൊല്ലം നീണ്ടകരയിൽ നിന്ന് മത്സ്യബന്ധനത്തിന് പോയ വള്ളമാണ് മുങ്ങിയത്.

രാജു, ജോൺബോസ്‌കോ, സഹായരാജു എന്നിവരെയാണ് കാണാതായത്. തമിഴ്‍നാട് സ്വദേശി സ്റ്റാലിന്റെ ഉടമസ്ഥതയിലുള്ള സൈലത്‍മാതാ എന്ന വള്ളമാണ് മുങ്ങിയത്. ബോട്ടിലുണ്ടായിരുന്ന ചിലരെ രക്ഷപ്പെടുത്തി. കാണാതായ മൂന്ന് പേരും തമിഴ്‌നാട് സ്വദേശികളാണ്. വള്ളത്തിലുണ്ടായിരുന്ന രണ്ടു പേർ നീന്തി രക്ഷപെട്ടു. തകർന്ന വള്ളം കരക്കടിഞ്ഞു.

കാണാതായവർക്ക് വേണ്ടി തെരച്ചിൽ ഊർജ്ജിതമാക്കണമെന്ന് ആവശ്യപ്പെട്ട് വിഴിഞ്ഞത്ത് മത്സ്യത്തൊഴിലാളികൾ പ്രതിഷേധം ആരംഭിച്ചു. തെരച്ചിൽ നടത്താൻ മതിയായ സഹായം നൽകുന്നില്ലെന്ന് ആരോപിച്ചാണ് മത്സ്യത്തൊഴിലാളികൾ റോഡ് ഉപരോധിച്ച് പ്രതിഷേധം നടത്തുന്നത്. അതിനിടെ, കടലാക്രമണം സംസ്ഥാനത്ത് അതിരൂക്ഷമായി. കൊല്ലം ആലപ്പാട്ട് നിരവധി വീടുകളിൽ വെള്ളം കയറി.

സംസ്ഥാനത്ത് മഴ കനക്കുന്നു: പമ്പ കരകവിഞ്ഞു, ഇടുക്കിയിൽ മണ്ണിടിച്ചിൽ

തെക്കൻ ജില്ലകളിൽ കൂടാതെ വടക്കൻ ജില്ലകളിലും ഇന്ന് ശക്തമായ മഴയുണ്ടായി. സംസ്ഥാനത്തെ മൂന്ന് ജില്ലകളിൽ കാലാവസ്ഥാ നിരീക്ഷണ കേന്ദ്രം റെഡ് അലർട്ട് പ്രഖ്യാപിച്ചിരുന്നു. കോട്ടയം, പത്തനംതിട്ട, ഇടുക്കി ജില്ലകളിലാണ് റെഡ് അലർട്ട് പ്രഖ്യാപിച്ചത്. തിരുവല്ല നന്നൂരിൽ ഒരാൾ മീൻ പിടിക്കുന്നതിനിടെ ഒഴുക്കിൽപ്പെട്ട് മരിച്ചു. അതിനിടെ, സംസ്ഥാനത്ത് അഞ്ച് ദിവസം കൂടി മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.

Red Alert in Idukki: മൂന്ന് ജില്ലകളിൽ റെഡ് അലർട്ട് പ്രഖ്യാപിച്ചു

മലയോര പ്രദേശങ്ങളിലേക്കുള്ള യാത്രകൾക്ക് നിയന്ത്രണം ഏർപ്പെടുത്തിയിട്ടുണ്ട്. ഇടുക്കിയിൽ പലയിടങ്ങളിൽ മണ്ണിടിച്ചിൽ ഉണ്ടായി. പാംബ്ള ഡാമിന്റെ ഷട്ടറുകൾ ഉയർത്തി. ഇന്ന് വൈകുന്നേരത്തോടെ മലങ്കര ഡാമിന്റെ ഷട്ടറുകളും ഉയർത്തിയേക്കും. പമ്പയിലെ ജലനിരപ്പുയർന്ന് മണൽപ്പുറത്തെ കടകളിൽ വെള്ളം കയറി. കാലാവസ്ഥാ നിരീക്ഷണ കേന്ദ്രം നൽകുന്ന മുന്നറിയിപ്പ് അനുസരിച്ച് അതത് വില്ലേജുകളിൽ ആവശ്യമെങ്കിൽ ക്യാമ്പുകൾ തുടങ്ങണമെന്ന് ജില്ലാ കളക്ടർമാർക്ക് നിർദേശം നൽകി.