ആലപ്പുഴയിൽ ബോട്ട് മുങ്ങി മൂന്ന് പേരെ കാണാതായി

ആലപ്പുഴ: എറണാകുളം വൈപ്പിനിൽ നിന്നും പുറപ്പെട്ട മത്സ്യബന്ധന ബോട്ട് മുങ്ങി മൂന്ന് തൊഴിലാളികളെ കാണാതായി. ബോട്ടിലുണ്ടായിരുന്ന നാല് പേരെ നാവികസേന രക്ഷപ്പെടുത്തി കരയ്ക്കെത്തിച്ചു. ആലപ്പുഴയിൽ നിന്നും 12 നോട്ടിക്കൽ മൈൽ അകലെ ആഴക്കടലിലാണ് മത്സ്യബന്ധന ബോട്ട് അപകടത്തില്‍ പെട്ടത്.

നാവികസേനയുടെ സമയോചിതമായ ഇടപെടല്‍ മൂലമാണ് നാല് തൊഴിലാളികള്‍ ജീവന്‍ രക്ഷപ്പെടുത്താന്‍ കഴിഞ്ഞത്. അപകടത്തിന് ശേഷം തടിയില്‍ പിടിച്ച് കിടന്നിരുന്ന തൊഴിലാളികളെ ഉടന്‍ തന്നെ കണ്ടെത്തി സേന ഹെലികോപ്റ്റര്‍ മാര്‍ഗം കരയിലെത്തിച്ചു. ഇവരുടെ ആരോഗ്യനിലയില്‍ ആശങ്കപ്പെടാനില്ലെന്ന് ആശുപത്രി അധികൃതര്‍ വ്യക്തമാക്കി,

മത്സ്യത്തൊഴിലാളികള്‍ കടലില്‍ പോകരുതെന്ന മുന്നറിയിപ്പ് അവഗണിച്ച് മത്സ്യബന്ധനത്തിന് പോയ തൊഴിലാളികളാണ് അപടത്തില്‍ പെട്ടത്. കാണാതായ മൂന്ന് തൊഴിലാളികള്‍ക്കായുള്ള തെരച്ചില്‍ തുടരുകയാണ്. അതേസമയം പ്രതികൂല കാലാവസ്ഥ മൂലം തെരച്ചില്‍ നടത്താന്‍ കഴിയാത്ത സാഹചര്യമാണ് നിലവിലുള്ളത്.