ഫ്‌ളെക്‌സി നിരക്കുകള്‍ ഉടന്‍ പിന്‍വലിക്കില്ലെന്ന് റെയില്‍വേ

ന്യൂഡല്‍ഹി: തിരക്കിനനുസരിച്ചു നിരക്കു വര്‍ധിപ്പിക്കുന്ന രീതി (ഫ്ലെക്സി നിരക്ക്) ക്കെതിരെ ശക്തമായ വിമര്‍ശനം ഉയര്‍ന്നതിനു പിന്നാലെ നടപടിയെ പ്രതിരോധിച്ച്‌ റെയില്‍വേ രംഗത്ത്. രാജധാനി, തുരന്തോ, ശതാബ്ദി ട്രെയിനുകളില്‍ ഏര്‍പ്പെടുത്തിയ ഫ്‌ളെക്‌സി നിരക്കുകള്‍ ഉടന്‍ പിന്‍വലിക്കില്ലെന്ന് റയിൽവേ അറിയിച്ചു. മറ്റ് ട്രെയിനുകളില്‍ ഈ നിരക്കുകള്‍ ഉടന്‍ നടപ്പാക്കില്ലെന്നും റെയില്‍വേ അറിയിച്ചു.

ഫ്ലെക്സി നിരക്കുകള്‍ നടപ്പാക്കിയെങ്കിലും ഇപ്പോഴും വിമാന, റോഡ് യാത്രകളേക്കാള്‍ ചെലവ് കുറവ് ട്രെയിന്‍ യാത്രയാണെന്ന് റെയില്‍വേ അധികൃതര്‍ വിശദീകരിച്ചു. മികച്ച പ്രതികരണമാണ് യാത്രക്കാരുടെ ഭാഗത്തു നിന്നു ലഭിക്കുന്നതെന്നും റെയില്‍വേ അവകാശപ്പെട്ടു. ഫ്ലെക്സി നിരക്കുകള്‍ റെയില്‍വേയില്‍ പുതിയതല്ല. പ്രീമിയം ട്രെയിനുകളായ സുവിധ, ഗതിമാന്‍ എക്സ്പ്രസ് തുടങ്ങിയവയും ഫ്ലെക്സി നിരക്കിന്റെ അടിസ്ഥാനത്തിലാണ് പ്രവര്‍ത്തിക്കുന്നത്. 500 കോടിയുടെ അധിക വരുമാനമാണ് നിരക്ക് വര്‍ധനവിലൂടെ ലക്ഷ്യമാക്കുന്നതെന്ന് റെയില്‍വേ അറിയിച്ചു.