പ്രതിഷേധത്തിനൊടവിൽ ശ്രീറാം വെങ്കിട്ടരാമനെ ഫാക്ട് ചെക്ക് വിഭാഗത്തിൽ നിന്ന് നീക്കി

തിരുവനന്തപുരം: സര്‍ക്കാരിനെതിരെയുള്ള 'വ്യാജവാര്‍ത്തകള്‍ കണ്ടെത്താനായി' സംസ്ഥാന സര്‍ക്കാര്‍ നിയോഗിച്ച ഫാക്ട് ചെക്ക് വിഭാഗത്തിൽ നിന്ന് ശ്രീറാം വെങ്കിട്ടരാമനെ നീക്കി. മാധ്യമപ്രവര്‍ത്തകനായ കെ എം ബഷീറിനെ വാഹനമിടിച്ചു കൊലപ്പെടുത്തിയ കേസിലെ പ്രതിയായ ഐഎഎസ് ഉദ്യോഗസ്ഥനെ ഫാക്ട് ചെക്ക് സമിതിയിൽ ഉള്‍പ്പെടുത്തിയ നീക്കത്തിനെതിരെ വാര്‍ത്തകള്‍ വന്നതിനു പിന്നാലെയാണ് സംസ്ഥാന സര്‍ക്കാര്‍ നീക്കം.

Also Read: 'ആത്‍മഹത്യ ചെയ്യില്ല, കെപിസിസി അധ്യക്ഷൻ നടത്തിയത് മ്ലേച്ഛമായ പരാമർശം'; മുല്ലപ്പള്ളിയെ കുരുക്കി സരിത എസ്. നായർ

ആരോഗ്യവകുപ്പിൽ ജോയിൻ്റ് സെക്രട്ടറിയായ ശ്രീറാമിന ഒക്ടോബര്‍ മാസത്തിലാണ് സര്‍ക്കാര്‍ ഫാക്ട് ചെക്ക് വിഭാഗത്തിൽ ഉള്‍പ്പെടുത്തിയത്. കൊവിഡ് 19 കാലത്ത് സമൂഹമാധ്യമങ്ങളിലടെയും മാധ്യമങ്ങളിലൂടെയും പ്രചരിക്കുന്ന വ്യാജസന്ദേശങ്ങള്‍ കണ്ടെത്താനും നടപടി സ്വീകരിക്കാനുമാണ് സംസ്ഥാന സര്‍ക്കാര്‍ ഇൻഫര്‍മേഷൻ പബ്ലിക് റിലേഷൻസ് വകുപ്പിൻ്റെ കീഴിൽ ഫാക്ട് ചെക്ക് വിഭാഗം ആരംഭിച്ചത്.

Also Read: ട്രംപ് അകത്തോ, പുറത്തോ? അമേരിക്ക വിധിയെഴുതുന്നു; വിവാദങ്ങളുടെ തെരഞ്ഞെടുപ്പ് കാലം

വകുപ്പ് സെക്രട്ടറി അധ്യക്ഷനായ സമിതിയിൽ പോലീസിൻ്റെ പ്രതിനിധിയും സൈബര്‍ പോലീസ്, ഫാക്ട് ചെക്കിങ് വിദഗ്ധര്‍ തുടങ്ങിയവരുമുണ്ട്. എന്നാൽ ഫാക്ട് ചെക്ക് എന്ന പേരിൽ സര്‍ക്കാര്‍ വിരുദ്ധ വാര്‍ത്തകള്‍ വ്യാജവാര്‍ത്തകളാക്കി മുദ്ര കുത്തുകയാണെന്ന ആരോപണം ഉയര്‍ന്നിരുന്നു. നടപടിയ്ക്കെതിരെ കേരള പത്രപ്രവർത്തക യൂണിയൻ സംസ്ഥാന സർക്കാരിന് കത്തുനൽകുകയും ചെയ്തിരുന്നു. ഇതിനു പിന്നാലെയാണ് ശ്രീറാം വെങ്കിട്ടരാമനെ സമിതിയിൽ നിന്ന് നീക്കിയത്.

അതേസമയം, കെ എം ബഷീറിനെ വാഹനമിടിച്ചു കൊലപ്പെടുത്തിയ കേസ് ഈ മാസം 12ന് കോടതി പരിഗണിക്കും. കേസുമായി ബന്ധപ്പെട്ട രേഖകള്‍ ശ്രീറാം വെങ്കിട്ടരാമന് കൈമാറാൻ പ്രോസിക്യൂഷന് കോടതി നിര്‍ദേശം നല്‍കി. അന്വേഷണസംഘം ശേഖരിച്ച സിസിടിവി ദൃശ്യങ്ങള്‍ അടക്കമുള്ളവ ആവശ്യപ്പെട്ടാണ് പ്രതിഭാഗം കോടതിയെ സമീപിച്ചത്.