ഭക്ഷ്യവിഷബാധയേറ്റ് വിദ്യാർഥികൾ ആശുപത്രിയിൽ

കോഴിക്കോട്: ഭക്ഷ്യവിഷബാധയേറ്റ് ഗുരുവായൂരപ്പൻ കോളജിലെ 43 വിദ്യാർത്ഥികളെ ആശുപത്രിയിൽ പ്രവേശിപ്പിച്ചു. കോളജ് ഹോസ്റ്റലിൽ വിളമ്പിയ വെജിറ്റബിൾ ബിരിയാണിയിൽ നിന്നാണ് ഭക്ഷ്യ വിഷബാധയേറ്റതെന്നാണ് സൂചന. ഇന്നലെ പരീക്ഷക്കിടെ അസ്വസ്ഥതയുണ്ടായ കുട്ടികളെ കോളജ് അധികൃതർ ഡോക്ടറെ വിളിച്ചു വരുത്തി ചികിത്സിച്ചെന്നും സംഭവം മറച്ചുവെക്കാൻ ശ്രമിച്ചെന്നും വിദ്യാർഥികൾ തന്നെ ആരോപിച്ചു.

ഭക്ഷ്യ സുരക്ഷാ വകുപ്പ് ഉദ്യോഗസ്ഥർ ഇന്ന് കോളജ് ഹോസ്റ്റലിൽ പരിശോധന നടത്തി. ഇന്നലെ തങ്ങൾക്ക് കൃത്യമായി മരുന്ന് ലഭിച്ചില്ലെന്നും വിദ്യാർഥികൾ ആരോപിച്ചു. കോഴിക്കോട് മിംസ് ആശുപത്രിയിലും മറ്റ് സ്വകാര്യ ആശുപത്രികളിലുമായി വിദ്യാർത്ഥികളെ ചികിത്സക്ക് പ്രവേശിപ്പിച്ചു. വിദ്യാർഥികൾക്ക് ഭക്ഷ്യവിഷബാധ ഏറ്റത് മറച്ചുവെക്കാൻ അധികൃതർ നടത്തിയ ശ്രമമാണ് ഏറെ കുഴമുണ്ടാക്കിയതെന്നും വിദ്യാർഥികൾ പറയുന്നു.