ഫോർമാലിന് പിടിവീണതോടെ മീനിൽ രോഗാണുനാശിനി?

തിരുവനന്തപുരം: മീൻ അഴുകാതിരിക്കാൻ ചേര്‍ക്കുന്ന ഫോര്‍മാലിൻ കണ്ടെത്താനുള്ള പരിശോധന ശക്തമായതോടെ എളുപ്പത്തിൽ കണ്ടെത്താനാകാത്ത പുതിയ രാസവസ്തുക്കള്‍ മീനിൽ ചേര്‍ക്കുന്നതായി റിപ്പോര്‍ട്ട്. മീൻ കേടാകാതിരിരക്കാൻ സിൽവര്‍ ഹൈഡ്രജൻ പെറോക്സൈഡ് ലായനി തളിക്കുന്നതായി സംസ്ഥാന ഭക്ഷ്യസുരക്ഷാവകുപ്പിന് വിവരം ലഭിച്ചതായി മാതൃഭൂമി റിപ്പോര്‍ട്ട് ചെയ്തു. ഈ രാസവസ്തു എങ്ങനെ ശരീരത്തെ ബാധിക്കുമെന്നത് സംബന്ധിച്ച് സര്‍ക്കാര്‍ അനലിറ്റിക്കൽ ലാബിൽ പരിശോധന തുടങ്ങിയതായും റിപ്പോര്‍ട്ടിൽ പറയുന്നു.

നിലവിൽ സിൽവര്‍ ഹൈ‍ഡ്രജൻ പെറോക്സൈഡ് കണ്ടെത്താനുള്ള എളുപ്പമാര്‍ഗങ്ങളില്ല. എറണാകുളത്തെ ചില രാസവസ്തു വിൽപനശാലകളിൽ നിന്ന് ബോട്ടുകാര്‍ ഇത് കൂടിയ അളവിൽ വാങ്ങിപ്പോകുന്നതായി കണ്ടെത്തിയിട്ടുണ്ട്. ഇതാണ് സംശയത്തിലേയ്ക്ക് വിരൽ ചൂണ്ടുന്നത്. എന്നാൽ രോഗാണുനാശിനിയായി ഉപയോഗിക്കുന്ന ഈ രാസവസ്തു ഉപയോഗിച്ചാൽ മീൻ കേടാകാതിരിക്കുമോ എന്ന കാര്യത്തിൽ വ്യക്തതയില്ല. ഇതുസംബന്ധിച്ചും പരിശോധന നടത്തുന്നുണ്ട്.

നിറമോ മണമോ ഇല്ലാത്ത സിൽവര്‍ ഹൈഡ്രജൻ പെറോക്സൈഡ് പൊതുവെ രോഗാണുനാശിനിയായാണ് ഉപയോഗിക്കുന്നത്. നേര്‍പ്പിക്കാതെ ഉപയോഗിച്ചാൽ ഇത് ശരീരത്തിൽ പൊള്ളലുണ്ടാക്കും. വെള്ളവുമായി ചേര്‍ത്ത് നേരിയ അളവിൽ ഇത് മീനിൽ തളിക്കുന്നുണ്ടോ എന്നാണ് സംശയം.

400 ചതുരശ്ര മീറ്റര്‍ വരെയുള്ള മണ്ണ് അണുവിമുക്തമാക്കാൻ മൂന്ന് ലിറ്റര്‍ സിൽവര്‍ ഹൈഡ്രജൻ പെറോക്സൈഡ് മതിയെന്ന് കൃഷിവിദഗ്ധര്‍ പറയുന്നു. എന്നാൽ ബോട്ടുകാര്‍ എറണാകുളത്തെ കടകളിൽ നിന്ന് 20 ലിറ്റര്‍ കന്നാസുകളിലാണ് ഇത് വാങ്ങിപ്പോകുന്നത്.

അതേസമയം, പരിശോധന കര്‍ശനമാക്കിയതോടെ അന്യസംസ്ഥാനങ്ങളിൽ നിന്നെത്തുന്ന മീനിൽ ഫോര്‍മാലിനും അമോണിയയും ചേര്‍ക്കുന്നത് കുറഞ്ഞെന്നാണ് റിപ്പോര്‍ട്ട്. കൊച്ചിയിലെ സെൻട്രൽ ഇൻസ്റ്റിറ്റ്യൂട്ട് ഓഫ് ഫിഷറീസ് ടെക്നോളജി തയ്യാറാക്കിയ പേപ്പര്‍ ടെസ്റ്റിലൂടെ ഫോര്‍മാലിനും അമോണിയയും എളുപ്പത്തിൽ കണ്ടെത്താനാകും.