കെജ്രിവാളിനു വേണ്ടി മോദിയെക്കണ്ട് നാല് മുഖ്യമന്ത്രിമാര്‍

ന്യൂഡൽഹി: ഡൽഹിയിലെ ഐഎഎസുകാരുടെ സമരം അവസാനിപ്പിക്കാൻ ഇടപെടണമെന്ന് ആവശ്യപ്പെട്ട് ലഫ്റ്റനൻ്റ് ഗവര്‍ണറുടെ ഓഫീസിൽ സമരം തുടരുന്ന മുഖ്യമന്ത്രി അരവിന്ദ് കെജ്രിവാളിനു വേണ്ടി പ്രധാനമന്ത്രിയുമായി കൂടിക്കാഴ്ച നടത്തി പിണറായി വിജയനും മറ്റു മൂന്നു മുഖ്യമന്ത്രിമാരും. ബംഗാള്‍ മുഖ്യമന്ത്രി മമതാ ബാനര്‍ജി, കര്‍ണാടക മുഖ്യമന്ത്രി എച്ച് ഡി കുമാരസ്വാമി, ആന്ധ്ര മുഖ്യമന്ത്രി ചന്ദ്രബാബു നായിഡു എന്നിവര്‍ക്കൊപ്പമാണ് പിണറായി വിജയൻ പ്രധാനമന്ത്രിയെ കണ്ടത്.

നീതി ആയോഗ് യോഗത്തിന് എത്തിയപ്പോഴായിരുന്നു പ്രധാനമന്ത്രിയുമായി മുഖ്യമന്ത്രിമാരുടെ കൂടിക്കാഴ്ച.ഡൽഹി സര്‍ക്കാരുമായി ബന്ധപ്പെട്ടുള്ള പ്രശ്നങ്ങള്‍ക്ക് എത്രയും പെട്ടെന്ന് പരിഹാരം കാണണമെന്ന് പശ്ചിമബംഗാള്‍ മുഖ്യമന്ത്രി മമതാ ബാനര്‍ജി ആവശ്യപ്പെട്ടു.

ഇതിനിടെ ലഫ്റ്റനൻ്റ് ഗവര്‍ണറുടെ വസതിയിൽ അരവിന്ദ് കെജ്രിവാളിന്‍റെ നേതൃത്വത്തിൽ നടത്തുന്ന സമരം ഏഴാം ദിവസത്തിലേയ്ക്ക് കടന്നു. മുൻ ജമ്മു കശ്മീര്‍ മുഖ്യമന്ത്രി ഒമര്‍ അബ്ദുള്ളയും കെജ്രിവാളിന് പിന്തുണയറിയിച്ചിരുന്നു.

അതേസമയം, കേന്ദ്രസര്‍ക്കാരിനെ ലക്ഷ്യമിട്ടുള്ള കെജ്രിവാളിന്‍റെ സമരം അദ്ദേഹത്തിന്‍റെ രാഷ്ട്രീയസ്വീകാര്യത വര്‍ദ്ധിപ്പിച്ചതായി വിലയിരുത്തപ്പെടുന്നു. നിലവിൽ കോൺഗ്രസ് ഒഴികെയുള്ള പ്രതിപക്ഷപാര്‍ട്ടികളെല്ലാം കെജ്രിവാളിനു പിന്തുണയുമായി എത്തിയിട്ടുണ്ട്. ബിജെപിയ്ക്കെതിരായ വിശാലസഖ്യം ശക്തിപ്പെടാനും ഡൽഹിയിലെ രാഷ്ട്രീയസാഹചര്യം കാരണമായിട്ടുണ്ടെന്നാണ് വിലയിരുത്തൽ.