ശ്യാമപ്രസാദിനെ കൊലപ്പെടുത്തിയ കേസിൽ നാലു പേർ പിടിയിൽ

പേരാവൂർ: എബിവിപി പ്രവർത്തകൻ ശ്യാമപ്രസാദിനെ വെട്ടി കൊലപ്പെടുത്തിയ കേസിൽ നാലു പേരെ പോലീസ് അറസ്റ്റ് ചെയ്തു. 25 കാരനായ ശ്യാമപ്രസാദ് ഐടിഐ വിദ്യാർഥിയായിരുന്നു. കാക്കയങ്ങാട് പാറക്കണ്ടം സ്വദേശികളാണ് അറസ്റ്റിലായത്. മുഹമ്മദ്(20), സലിം(26), സമീർ (25), ഹാഷിം(39) എന്നിവരെയാണ് പോലീസ് അറസ്റ്റ് ചെയ്തത്.

പേരാവൂർ സർക്കിൾ ഇൻസ്‌പെക്ടർ എ.കുട്ടികൃഷ്ണനാണ് കേസ് അന്വേഷിക്കുന്നത്. ശ്യാമപ്രസാദിനെ കൊലപ്പെടുത്തിയ ശേഷം പേര്യ ചുരം വഴി വയനാട്ടിലേക്ക് രക്ഷപെടാൻ ശ്രമിക്കവേ ബോയ്‌സ് ടൗണിന് സമീപത്ത് വെച്ചാണ് ഇവരെ അറസ്റ്റ് ചെയ്തത്. ഇന്ന് വൈകിട്ടോടെ ഇവരെ കോടതിയിൽ ഹാജരാക്കും. കൊലക്ക് പിന്നിൽ രാഷ്ട്രീയ വൈരഗ്യമാണെന്നാണ് സൂചന. ശ്യാമപ്രസാദിനെ കൊലപ്പെടുത്തിയതിൽ പ്രതിഷേധിച്ച് ഇന്ന് വൈകിട്ട് ആറു വരെ കണ്ണൂർ ജില്ലയിൽ ഹർത്താൽ ആചരിക്കുകയാണ്. ശ്യാമപ്രസാദിന്‍റെ സംസ്‌കാരം ഇന്ന് നടക്കും. ശ്യാമപ്രസാദിന്‍റെ മൃതദേഹം പരിയാരം മെഡിക്കൽ കോളജിൽ സൂക്ഷിച്ചിരിക്കുകയാണ്.