തൃശൂരില്‍ കാല്‍നടയാത്രക്കാരിലേക്ക് കാര്‍ പാഞ്ഞുകയറി നാലു മരണം

തൃശൂര്‍: കാല്‍നടയാത്രക്കാരിലേക്ക് കാര്‍ പാഞ്ഞുകയറി നാല് മരണം. തൃശൂര്‍ കൊറ്റനെല്ലൂരില്‍ ചൊവ്വാഴ്ച പുലര്‍ച്ചെ 12.30 യോടെയാണ് അപകടം ഉണ്ടായത്. കൊറ്റനെല്ലൂര്‍ തേരപ്പിള്ളി സ്വദേശി സുബ്രന്‍ (54), മകള്‍ പ്രജിത (23), കണ്ണന്തറ ബാബു (56), മകന്‍ വിപിന്‍ (29) എന്നിവരാണ് മരിച്ചത്. പരിക്കേറ്റവരെ മാളയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇതില്‍ ഒരാളുടെ നില ഗുരുതരമാണ്.

തുമ്പൂര്‍ അയ്യപ്പന്‍കാവില്‍ ഉത്സവം കഴിഞ്ഞു വീട്ടിലേക്ക് മടങ്ങുന്നവരുടെ ഇടയിലേക്ക് കാര്‍ പാഞ്ഞുകയറുകയായിരുന്നു. പൈങ്ങോട് സ്വദേശികളായ യുവാക്കള്‍ ഓടിച്ചിരുന്ന കാറാണ് അപകടത്തിന് ഇടയാക്കിയത്. യുവാക്കളെ ആളൂര്‍ പോലീസ് കസ്റ്റഡിയിലെടുത്തു.

ഡ്രൈവര്‍ മദ്യപിച്ചിരുന്നില്ലെന്നു പോലീസ് പറഞ്ഞു. എന്നാല്‍, കൂടെ ഉണ്ടായിരുന്ന സുഹൃത്തുക്കള്‍ മദ്യലഹരിയിലായിരുന്നെന്നു സൂചനയുണ്ട്. മൃതദേഹങ്ങള്‍ പോസ്റ്റ്‌മോര്‍ട്ടത്തിനു ശേഷം ഇന്ന് ഉച്ചയ്ക്ക് ബന്ധുക്കള്‍ക്ക് വിട്ടുനല്‍കും.