ഫാ. ജോബ് ചിറ്റിലപ്പിള്ളി വധം: പ്രതിയെ ഹൈക്കോടതി വെറുതെ വിട്ടു

കൊച്ചി: ഫാദര്‍ ജോബ് ചിറ്റിലപ്പിള്ളിയെ കുത്തിക്കൊന്ന കേസിലെ പ്രതി രഘു കുമാറിനെ ഹൈക്കോടതി വെറുതെ വിട്ടു. രഘു കുമാറിന് ഇരട്ട ജീവപര്യന്തം വിധിച്ച സിബിഐ കോടതിയുടെ വിധി ഹൈക്കോടതി റദ്ദാക്കി.

2012ലാണ് കൊച്ചി സിബിഐ കോടതി പ്രതിയ്ക്ക് ഇരട്ട ജീവപര്യന്തം വിധിച്ചത്. എന്നാൽ പ്രതിയ്ക്കെതിരായ കുറ്റം തെളിയിക്കുന്നതിൽ പ്രോസിക്യൂഷൻ ദയനീയമായി പരാജയപ്പെട്ടെന്ന് ഹൈക്കോടതി വ്യക്തമാക്കി.

ചാലക്കുടി തുരുത്തിപ്പറമ്പ് വരപ്രസാദമാതാ പള്ളിയിലെ വികാരിയായിരുന്ന ഫാ. ജോബ് ചിറ്റിലപ്പിള്ളി 2004 ഓഗസ്റ്റ് 28നാണ് കുത്തേറ്റ് മരിച്ചത്. ആദ്യഘട്ടത്തിൽ ക്രൈംബ്രാഞ്ച് അന്വേഷിച്ച കേസ് പിന്നീട് സിബിഐയ്ക്ക് കൈമാറുകയായിരുന്നു. വൈദികനോട് പ്രതിയ്ക്കുണ്ടായിരുന്ന വ്യക്തിവൈരാഗ്യമാണ് കൊലപാതകത്തിലേയ്ക്ക് നയിച്ചതെന്നായിരുന്നു സിബിഐയുടെ കണ്ടെത്തൽ.