പ്രകൃതി വിരുദ്ധപീഡനം; പോലീസിനെ കണ്ട് ഓടിയ വികാരി അറസ്റ്റിൽ

തിരുവനന്തപുരം: പ്രകൃതിവിരുദ്ധ പീഡനത്തിന്റെ പേരിൽ പോലീസിനെ വെട്ടിച്ചു മുങ്ങിയ വൈദികൻ പിടിയിലായി. കൊല്ലം പുത്തൂരിൽ നിന്ന് മുങ്ങിയ വൈദികനെ മധുരയിൽ നിന്നാണ് പൊലീസ് പിടികൂടിയത്. തേവലപ്പുറം പുല്ലാമലയിൽ പ്രവർത്തിക്കുന്ന സെമിനാരിയിൽ വൈദികപഠനത്തിനെത്തിയ മൂന്നു കുട്ടികളെ പ്രകൃതിവിരുദ്ധ പീഢനത്തിനിരയാക്കിയ കേസിലാണ് കണ്ണൂർ സ്വദേശി ഫാ.തോമസ് പാറേക്കള(30)ത്തിനെ അറസ്റ്റ് ചെയ്തത്. കൊല്ലം പൂത്തൂർ സെന്റ് മേരീസ് പള്ളി വികാരിയാണ് ഫാ. തോമസ് പാറേക്കളം. 2016 ജൂലായ് മാസത്തിലാണ് കേസിനാസ്പദമായ സംഭവം. ചോദ്യംചെയ്യലിനായി കൊട്ടാരക്കര റൂറൽ എസ്‌പി ഓഫീസിലേക്ക് പ്രതിയെ വൈകാതെ എത്തിക്കും

മൂഴിക്കോട് സെന്റ്‌മേരീസ് പള്ളിയിലും പുല്ലാമല ഹോളി ക്രോസ് പള്ളിയിലും വികാരിയായി പ്രവർത്തിച്ചുവരികയായിരുന്നു. ചെന്നൈ ആസ്ഥാനമാക്കി പ്രവർത്തിക്കുന്ന എസ്.ഡി.എം സന്ന്യാസ സമൂഹത്തിലെ അംഗമാണ്. പുല്ലാമലയിൽ പ്രവർത്തിച്ചിരുന്ന സെമിനാരിയിലെ വൈദിക അദ്ധ്യാപകനായിരുന്നു. ഇവിടെ വൈദികപഠനത്തിനെത്തിയ കുട്ടികളെ മൂഴിക്കോട്ടെ പള്ളിയുടെ രണ്ടാംനിലയിൽകൊണ്ടുപോയി പ്രകൃതിവിരുദ്ധ പീഡനത്തിനിരയാക്കുമായിരുന്നുവെന്നാണ് പരാതി. സെമിനാരിയിൽനിന്ന് പഠനം നിർത്തിപ്പോയ പൂവാർ കരിങ്കുളം സ്വദേശിയായ 14 കാരൻ വീട്ടുകാരോടൊപ്പം പൂവാർ സി.ഐയ്ക്കാണ് പരാതിനൽകിയത്. തന്നോടൊപ്പം മറ്റു മൂന്നുകുട്ടികളെയും ഇത്തരത്തിൽ പീഡിപ്പിച്ചിരുന്നുവെന്നും പരാതിയിൽ പറയുന്നു.