തഴക്കക്കര സഹകരണ ബാങ്കിൽ 50 കോടിയുടെ തട്ടിപ്പ്

ആലപ്പുഴ: മാവേലിക്കര തഴക്കര സഹകരണ ബാങ്ക് ശാഖയിൽ 50 കോടി രൂപയുടെ ക്രമക്കേട് കണ്ടെത്തി. തട്ടിപ്പ് കണ്ടെത്തി റിപ്പോർട്ട് ചെയ്‌ത ബാങ്ക് സെക്രട്ടറി അന്നമ്മ മാത്യുവിന്‍റെയും ഓഡിറ്റര്‍ എസ് കൃഷ്ണകുമാരിയുടെയും വീടുകൾ അജ്ഞാതർ നശിപ്പിച്ചു.

പത്ത് ശാഖകളാണ് ബാങ്കിനുള്ളത്. ഇതിൽ തഴക്കര ശാഖയുടെ 40 ശതമാനം മാത്രം ഓഡിറ്റ് കഴിഞ്ഞപ്പോഴാണ് 50 കോടിയുടെ തട്ടിപ്പ് കണ്ടെത്തിയത്. ഒരു വർഷം മുൻപ് കൃഷ്ണകുമാരിയമ്മ തട്ടിപ്പ് കണ്ടെത്തിയതിനെ തുടർന്ന് കൊല്ലത്തേക്ക് അവരെ സ്ഥലം മാറ്റിയിരുന്നു. ബാങ്കിന്‍റെ സോഫ്ട്‍വെയറിൽ കൃത്രിമം കാട്ടിയെന്ന് കൃഷ്ണകുമാരിയമ്മ റിപ്പോർട്ട് നൽകിയിരുന്നു.

സൈബർ സെല്ലിനെകൊണ്ട് അത് അന്വേഷിപ്പിക്കണമെന്ന് സോഫ്ട്‍വെയർ നൽകിയ സ്ഥാപനത്തിന്‍റെ മാനേജിങ് ഡയറക്ടര്‍ ബി.കെ. പ്രസാദും റിപ്പോര്‍ട്ട് നല്‍കിയിരുന്നു. തുടർന്ന് ബാങ്ക് ഭരണസമിതി നടത്തിയ അന്വേഷണത്തെ തുടർന്നാണ് 50 കോടിയുടെ തട്ടിപ്പ് വ്യക്തമായത്. ശാഖാമാനേജരടക്കം മൂന്നു ജീവനക്കാരെ സസ്‌പെൻഡ് ചെയ്‌തു. സഹകരണ വകുപ്പുതല അന്വേഷണം നടന്നു വരികയാണ് ഇപ്പോൾ.

Fraud of 50 crores found in Thazhakkara Co-operative bank branch