തിങ്കളാഴ്ചകളിൽ ബിനാലെയിൽ സൗജന്യ പ്രവേശനം

കാക്കനാട്: തിങ്കളാഴ്ചകളിൽ ബിനാലെയിൽ സൗജന്യ പ്രവേശനം ഏർപ്പെടുത്തിയതായി കൊച്ചി മുസിരിസ് ബിനാലെ ഫൗണ്ടേഷൻ. ഫൗണ്ടേഷൻ പ്രസിഡന്റ് ബോസ് കൃഷ്ണമാചാരിയാണ് ഇക്കാര്യം അറിയിച്ചത്. തദ്ദേശീയരായവർക്ക് പ്രാതിനിധ്യം നൽകാനും പണമില്ലാത്തത് കലാസ്വാദനത്തിന് തടസ്സമാകാതിരിക്കാനുമാണിതെന്ന് അദ്ദേഹം വ്യക്തമാക്കി.

ഇന്ത്യയുൾപ്പെടെ 32 രാജ്യങ്ങളിൽ നിന്നായി 138 കലാകാരന്മാരുടെ 94 സൃഷ്ടികളാണ് ഫോർട്ടുകൊച്ചിയിൽ ഒരുക്കിയിട്ടുള്ള ബിനാലെയിലുള്ളത്. രാവിലെ 10 മുതൽ വൈകീട്ട് ആറുമണി വരെയാണ് സന്ദർശന സമയം. എല്ലാ ദിവസവും വൈകീട്ട് ആറിന് ഫോർട്ടുകൊച്ചി കബ്രാൾ യാർഡിൽ ലോക സിനിമകളുടെ സൗജന്യ പ്രദർശനവുമുണ്ടാകും. 108 ദിവസം നീളുന്ന ബിനാലെ മാർച്ച് 29 നാണ് അവസാനിക്കുന്നത്.