ഇന്ധന നികുതി ഇനത്തിൽ സര്‍ക്കാരിന് വമ്പൻ ലോട്ടറി

തിരുവനന്തപുരം: രാജ്യമൊട്ടാകെ ഇന്ധനവില റെക്കോര്‍ഡ് വേഗത്തിൽ കുതിക്കുമ്പോൾ സംസ്ഥാന സര്‍ക്കാര്‍ വൻ നേട്ടം കൊയ്യുന്നു. സംസ്ഥാന സര്‍ക്കാരിനു ഇന്ധന നികുതി വരുമാന ഇനത്തിൽ ജനുവരിയില്‍ 640 കോടിരൂപയാണ് ലഭിച്ചത്. 2017 ഡിസംബറില്‍ ലഭിച്ചതിനേക്കാള്‍ 18 കോടി രൂപയാണ് സര്‍ക്കാരിന് അധികമായി ലഭിച്ചത്. 2017 ഓഗസ്റ്റിന് ശേഷം ലഭിക്കുന്ന ഏറ്റവും വലിയ തുകയാണ് ഇത്. ജിഎസ്ടി സെല്‍ അധികൃതര്‍ വ്യക്തമാക്കുന്നതാണ് ഇക്കാര്യം. ഇന്ധനവിലയിൽ ദിവസേന കൃത്യമായ വര്‍ധനവുണ്ടാകുന്നതിനാൽ ഈ മാസവും വരുമാനത്തിൽ മികച്ച തുക ലഭിക്കുമെന്നാണ് സര്‍ക്കാര്‍ കണക്കുകൂട്ടുന്നത്.

എക്സൈസ് വകുപ്പിൽ നിന്ന് കിട്ടുന്ന നികുതി വരുമാനമാണ് സര്‍ക്കാരിന്‍റെ വരുമാനത്തില്‍ മുഖ്യപങ്കു വഹിക്കുന്നതെങ്കിലും അതിനുശേഷം ഇന്ധന നികുതിയാണ് തൊട്ടുപിന്നാലെയുള്ളത്. അതിനാൽ തന്നെ പെട്രോളിന്‍റെയും ഡീസലിന്‍റെയും വില്‍പ്പന വഴി സര്‍ക്കാരിനു ലഭിക്കുന്ന നികുതി കുറയ്ക്കാന്‍ സാധിക്കില്ലെന്നാണ് സര്‍ക്കാരിന്‍റെ നിലപാട്. സാധാരണക്കാര്‍ക്ക് വിലവര്‍ധനവ് ചില്ലറബുദ്ധിമുട്ടല്ല സൃഷ്ടിക്കുന്നത്. എന്നാൽ ധനമന്ത്രി ടി.എം.തോമസ് ഐസക് ഇത് സംസ്ഥാനത്തിന്‍റെ വരുമാനത്തിനു ഗുണമാണെന്ന് തന്നെയാണ് കഴിഞ്ഞദിവസം നിയമസഭയിൽ വ്യക്തമാക്കിയത്.