മൂന്നാ‍ർ റസ്റ്റ് ഹൗസിൽ ജി.സുധാകരൻെറ മിന്നൽ പരിശോധന

ഇടുക്കി: മൂന്നാർ പി.ഡബ്ല്യു.ഡി റസ്റ്റ് ഹൗസിൽ പൊതുമരാമത്ത് മന്ത്രി ജി.സുധാകരൻ മിന്നൽ പരിശോധന നടത്തി. നിരവധി ക്രമക്കേടുകളാണ് മന്ത്രിയുടെ പരിശോധനയിൽ കണ്ടെത്തിയത്. റസ്റ്റ് ഹൗസിലെ മുറികൾ സ്വകാര്യ കമ്പനിക്ക് വാടകക്ക് നൽകിയതായി കണ്ടെത്തിയിട്ടുണ്ട്.

ഇതുമായി ബന്ധപ്പെട്ട് അന്വേഷണം നടത്താൻ മന്ത്രി ന‍ിർദ്ദേശിച്ചു. പോലീസ് റിപ്പോര്‍ട്ടിന് ശേഷം വകുപ്പ് തലത്തില്‍ നടപടി എടുക്കുന്ന കാര്യം ആലോചിച്ച് വരികയാണെന്നും മന്ത്രി വ്യക്തമാക്കി.

പൊതു മേഖലാ സ്ഥാപനത്തിൻെറ രജിസ്റ്റ‍ർ പോലും സ്വകാര്യ വ്യക്തികൾ കയ്യടക്കി വെച്ചിരിക്കുന്നതായാണ് കണ്ടെത്താൻ സാധിച്ചത്. പൊതുമുതല്‍ അടിയറവ് വെച്ചതിന് സര്‍ക്കാര്‍ ആവശ്യമായ നടപടി സ്വീകരിക്കുമെന്നും ജി.സുധാകരൻ പറഞ്ഞു.

"സര്‍ക്കാരിന്‍റെ സ്വത്ത് ലജ്ജയില്ലാതെ സ്വകാര്യ മേഖലയ്ക്ക് പരസ്യമായി അടിയറ വെച്ചിരിക്കുന്നതായാണ് മനസ്സിലായത്. റൂമുകള്‍ എല്ലാം തുറന്ന് കിടക്കുന്നു. ജീവനക്കാര്‍ ആരും തന്നെയില്ല." ഇതായിരുന്നു അവിടുത്തെ അവസ്ഥയെന്ന് മന്ത്രി പറഞ്ഞു.