'നാഷണൽ പൊളിറ്റിക്കൽ ഗുണ്ട'യാണ് അമിത് ഷാ: ജി.സുധാകരൻ

കണ്ണൂർ: ബിജെപി ദേശീയാധ്യക്ഷൻ അമിത് ഷാക്കെതിരെ രൂക്ഷ വിമർശനം ഉന്നയിച്ച് ജി.സുധാകരൻ. കേരളത്തിലെ സർക്കാരിനെ വലിച്ച് താഴെയിടുമെന്ന അമിത് ഷായുടെ പരാമര്ശത്തിനെതിരെയാണ് സുധാകരന്റെ പ്രതികരണം. സർക്കാരിനെ അട്ടിമറിക്കാൻ തടി മാത്രമുണ്ടായിട്ട് കാര്യമില്ല. അതിന് ശ്രമിക്കുന്നവർക്ക് മനോബലം വേണമെന്നും ജി.സുധാകരൻ പൊതു യോഗത്തിൽ പറഞ്ഞു.

കോടതിയെയും ജനാധിപത്യസംവിധാനത്തെയും അമിത് ഷാ വെല്ലുവിളിക്കുകയാണ് ചെയ്യുന്നതെന്നും സുധാകരൻ ആരോപിച്ചു. ബ്രാഹ്മണ മേധാവിതിത്വത്തിന്റെ അവസാനത്തിനാണ് ഇപ്പോൾ തുടക്കം കുറിച്ചിരിക്കുന്നതെന്നും സുധാകരൻ ചൂണ്ടിക്കാട്ടി. അമിത് ഷാ പ്രസംഗം പിൻവലിച്ച് മാപ്പ് പറയണമെന്ന് സുധാകരൻ യോഗത്തിൽ ആവശ്യപ്പെട്ടു. രാഹുൽ ഈശ്വർ നല്ല അറിവുള്ള വ്യക്തിയാണെന്നും ആ അറിവ് നല്ല കാര്യങ്ങൾക്ക് ഉപയോഗിച്ചിരുന്നെങ്കിൽ നല്ലതാകുമായിരുന്നെന്നും പൊതുമരാമത്ത് മന്ത്രി പറഞ്ഞു.

Read More: സര്‍ക്കാരിനെ വലിച്ച് താഴെ ഇടാന്‍ മടിക്കില്ലെന്ന് അമിത് ഷാ

കേരള സന്ദർശനത്തിനെത്തിയ അമിത് ഷാ കേരളത്തിലെ സമുദായ സംഘടനകളെ ഒപ്പം നിർത്തണമെന്ന് സംസ്ഥാന ബിജെപി നേതൃത്വത്തോട് ആവശ്യപ്പെട്ടിരുന്നു.അടുത്ത ലോക്‌സഭാ തെരഞ്ഞെടുപ്പിൽ സീറ്റ് ഉറപ്പാക്കിയില്ലെങ്കിൽ ദേശീയ നേതൃത്വം ഒപ്പം നിൽക്കില്ലെന്ന താക്കീതും ദേശീയാധ്യക്ഷൻ നൽകി.സർക്കാരിനെതിരെയുള്ള അമിത് ഷായുടെ പ്രസ്താവനയോട് മുഖ്യമന്ത്രി പിണറായി വിജയൻ രൂക്ഷമായി പ്രതികരിച്ചിരുന്നു.

Read More: സാമുദായിക സംഘടനകളെ ഒപ്പം നിർത്തണമെന്ന് അമിത് ഷാ

അമിത് ഷായുടെ പ്രസ്താവനയെ അപലപിച്ച് കൊണ്ട് മന്ത്രി ജി.സുധാകരൻ കഴിഞ്ഞ ദിവസം ഫേസ്‌ബുക്കിൽ എഴുതിയിരുന്നു. മോദി- അമിത് ഷാ കൂട്ട് കേട്ട് നാടിന് ഭീഷണിയാണെന്ന് സുധാകരൻ എഴുതിയിരുന്നു. സമാധാനവും സന്തോഷവുമാണ് ജനങ്ങൾ ആഗ്രഹിക്കുന്നത്. സ്ത്രീകളുടെ അന്തസ് ഉയർത്തിപ്പിടിച്ച് ക്രമസമാധാനം ഉറപ്പു വരുത്തി പിണറായി സർക്കാർ മുന്നോട്ട് പോവുക തന്നെ ചെയ്യുമെന്ന് സുധാകരൻ ഫെബുക്കിൽ കുറിച്ചിരുന്നു.