മറൈൻഡ്രൈവിന് പുന‍ര്‍ജന്മം: വൻപദ്ധതികളുമായി ജിസിഡിഎ

കൊച്ചി: നാശോന്മുഖമായ മറൈൻഡ്രൈവ് വാക്ക് വേയ്ക്ക് പുതുമോടിയേകാനായി കോടികളുടെ പദ്ധതികളുമായി വിശാല കൊച്ചി വികസന അതോരിറ്റി. ബഹുനില പാര്‍ക്കിങ് സംവിധാനം ഉള്‍പ്പെടെയുള്ള പദ്ധതികളാണ് ജിസിഡിഎ വിഭാവനം ചെയ്യുന്നത്. പ്രതീക്ഷിച്ചതുപോലെ മുന്നേറിയാൽ നഗരത്തിലെ വിനോദസഞ്ചാരമേഖലയ്ക്കും പദ്ധതി മുതൽക്കൂട്ടാകും.

മറൈൻ ഡ്രൈവിൽ ഹെലിപ്പാഡ് ഗ്രൗണ്ടിനു സമീപം ഇപ്പോള്‍ ഉപയോഗിക്കുന്ന പാര്‍ക്കിങ് സ്ഥലം മുഴുവനായി ഉപയോഗിച്ചു കൊണ്ടായിരിക്കും ബഹുനില പാര്‍ക്കിങ് സംവിധാനം നടപ്പാക്കുക. ഇപ്പോള്‍ ഒരു കാര്‍ പാര്‍ക്ക് ചെയ്യാൻ ഉപയോഗിക്കുന്ന സ്ഥലം പത്തുകാറുകള്‍ക്കു വരെ ഉപയോഗിക്കാനാവുന്ന സംവിധാനമാണ് പിപിപി മോഡലിൽ ഒരുക്കുക. നഗരത്തിലെയും പ്രത്യേകിച്ച് ബ്രോഡ്‍‍വേയിലെയും പാര്‍ക്കിങ് പ്രശ്നങ്ങള്‍ക്ക് പദ്ധതി പരിഹാരമാകുമെന്ന് ജിസിഡിഎ ചെയര്‍മാൻ സിഎൻ മോഹനൻ പറഞ്ഞു.

ജിസിഡിഎയ്ക്ക് സാമ്പത്തികബാധ്യത ഉണ്ടാക്കാത്ത തരത്തിൽ റോപ്‍‍‍വേ സംവിധാനം നടപ്പാക്കാനും പദ്ധതിയിടുന്നുണ്ട്. ഇരുന്നൂറുകോടി രൂപ ചെലവുവരുന്ന പദ്ധതിയ്ക്കായി ആഗോള ടെൻഡര്‍ ക്ഷണിക്കും. മറൈൻഡ്രൈവിൽ നിന്നു ബോൾഗാട്ടിയിലേയ്ക്കും തിരിച്ചും റോപ് വേ വഴി യാത്രക്കാരെ കൊണ്ടു പോകാനാണ് പദ്ധതി.

ഇതോടൊപ്പം മറൈൻഡ്രൈവ് സൗന്ദര്യവത്കരണത്തിനയി അഞ്ചുകോടി രൂപയുടെ പദ്ധതിയും ഉടൻ നടപ്പാക്കും. പദ്ധതിയ്ക്ക് സര്‍ക്കാര്‍ അംഗീകാരം ലഭിച്ചിട്ടുണ്ട്. മറൈൻഡ്രൈവ് ഗ്രൗണ്ടിനു ചുറ്റും മതിൽ കെട്ടാനും ചെടികള്‍ നട്ട് മനോഹരമാക്കാനുമാണ് പദ്ധതി. ഗ്രൗണ്ടിലേയ്ക്ക് പ്രവേശിക്കാൻ രണ്ടിടത്ത് കമാനങ്ങളുമുണ്ടാവും. കായൽഭാഗത്ത് നെറ്റ് കെട്ടി സംരക്ഷിക്കുകയും ചെയ്യും.

നിലവിൽ പരിപാടികള്‍ക്കായി ഗ്രൗണ്ട് വാടകയ്ക്ക് എടുക്കുന്നവര്‍ അലക്ഷ്യമായാണ് ഉപയോഗിക്കുന്നത്. സൗന്ദര്യവത്കരണം പൂര്‍ത്തിയാകുന്നതോടെ ഗ്രൗണ്ട് എങ്ങനെ ഉപയോഗിക്കണമെന്ന കാര്യത്തിലും കൃത്യമായ നിരീക്ഷണം ഉണ്ടാകും. മാലിന്യസംസ്കരണത്തിന് ഉള്‍പ്പെടെ കൃത്യമായ മാര്‍ഗനിര്‍ദേശങ്ങള്‍ നല്‍കുകയും അവ നടപ്പാക്കുന്നുണ്ടെന്ന് ഉറപ്പാക്കുകയും ചെയ്യും.

മറൈൻ ഡ്രൈവിലെ പൊളിഞ്ഞു കിടക്കുന്ന ടൈലുകളും പ്രവര്‍ത്തിക്കാത്ത വിളക്കുകളും നന്നാക്കാൻ കരാര്‍ നല്‍കിയിട്ടുള്ള പരസ്യ ഏജൻസിയ്ക്ക് നിര്‍ദേശം നല്‍കിയതായി ജിസിഡിഎ അധികൃതര്‍ അറിയിച്ചു. നടപ്പാതയിൽ അനധികൃതമായി പ്രവര്‍ത്തിക്കുന്ന കച്ചവടക്കാരെ കഴിഞ്ഞ ദിവസം ഒഴിപ്പിച്ചിരുന്നു.