ഗസല്‍ ഗായകന്‍ ഉമ്പായി അന്തരിച്ചു

കൊച്ചി: പ്രശസ്‍ത ഗസല്‍ ഗായകന്‍ ഉമ്പായി അന്തരിച്ചു. ആലുവയിലെ സ്വകാര്യ ആശുപത്രിയില്‍ വച്ചായിരുന്നു അന്ത്യം. 68 വയസായിരുന്നു. ദീര്‍ഘകാലം അര്‍ബുദ രോഗത്തിന് ചികിത്സയിലായിരുന്നു. പി.എ. ഇബ്രാഹിം എന്നാണ് യഥാര്‍ഥ പേര്.

കൊച്ചി മട്ടാഞ്ചേരിയില്‍ ആണ് ഉമ്പായി ജനിച്ചത്. ദരിദ്രമായ സാഹചര്യങ്ങളില്‍ നിന്നാണ് ഉമ്പായി വളര്‍ന്നു വന്നത്. പിതാവ് കടുത്ത കമ്മ്യൂണിസ്റ്റ് അനുയായിയായ ഇ.എം.എസ് അബൂബക്കര്‍. പിതാവിന്‍റെ ഇഷ്‍ടത്തിന് വിരുദ്ധമായാണ് താന്‍ സംഗീതം ജീവിതമാക്കിയതെന്ന് ഉമ്പായി അഭിമുഖങ്ങളില്‍ പറഞ്ഞിട്ടുണ്ട്.

ഹാര്‍മോണിയം ആണ് ഉമ്പായിയുടെ പ്രിയപ്പെട്ട സംഗീതോപകരണം. നാലാമത്തെ മകനാണ് ഹാര്‍മോണിയം എന്നായിരുന്നു അദ്ദേഹത്തിന്‍റെ വിശേഷണം. തബലയില്‍ നിന്നാണ് ഉമ്പായി തുടങ്ങിയത്. ശാസ്ത്രീയമായി തബല അഭ്യസിച്ചിരുന്നില്ല. പിന്നീട് ഗായകന്‍ മെഹ്‍ബൂബിന്‍റെ നിര്‍ദേശ പ്രകാരം ബോംബേയിലേക്ക് തബല പഠിക്കാന്‍ പോയി. ഗസല്‍ ഗായകന്‍ ആയത് നിയോഗമാണെന്നാണ് ഉമ്പായി വിശേഷിപ്പിച്ചിരുന്നത്. പ്രശസ്‍ത ഗസല്‍ ഗായകന്‍ മെഹ്‍ദി ഹസന്‍റെ‍ ഗാനങ്ങളാണ് ഗസല്‍ ഗാനരംഗത്തേക്ക് തിരിയാന്‍ പ്രേരിപ്പിച്ചത്.

യുവത്വകാലത്ത് കടുത്ത മദ്യപാനിയായിരുന്നു താനെന്ന് അഭിമുഖങ്ങളില്‍ ഉമ്പായി തുറന്നു പറഞ്ഞിട്ടുണ്ട്. മട്ടാഞ്ചേരിയില്‍ ഡ്രൈവര്‍ ആയി ജോലി നോക്കിയിട്ടുണ്ട്. സംഗീതത്തിലെ ഗുരുവിനെ തേടി ബോംബേയിലേക്കുള്ള യാത്രകള്‍ തുടര്‍ന്നപ്പോള്‍ കള്ളക്കടത്ത് സംഘത്തിന്‍റെ ഭാഗമായി. വരുമാനം കണ്ടെത്താനായിരുന്നു കള്ളക്കടത്ത്. പിന്നീട് മഞ്ഞപ്പിത്തം പിടിച്ച് ചികിത്സയില്‍ കഴിഞ്ഞതോടെയാണ് മദ്യപാനം ഉപേക്ഷിച്ചതും സംഗീതമേഖലയിലേക്ക് തിരിഞ്ഞതും.

മൂന്നു സിനിമകള്‍ക്ക് ഉമ്പായി സംഗീതം നല്‍കി. ഇതിഹാസ സംവിധായകന്‍ ജോണ്‍ എബ്രഹാമിന്‍റെ സിനിമ, അമ്മ അറിയാനില്‍ സംഗീതം നല്‍കിയതും ഉമ്പായിയാണ്.

ഉമ്പായിയുടെ മരണത്തില്‍ മുഖ്യമന്ത്രി പിണറായി വിജയന്‍ അനുശോചിച്ചു. ഉമ്പായിയുടെ വിയോഗം ഗസല്‍ സംഗീത മേഖലയ്ക്ക് വലിയ നഷ്‍ടമാണെന്ന് മുഖ്യമന്ത്രി പറഞ്ഞു.

(Updating...)